Lek i ri apo lek i vjetër? Ky fenomen vijon të ngatërrojë më shumë se 54% të qytetarëve shqiptarë ende pas shumë dekadash.
Termat e gabuar të lekut përdoren më shumë në familje dhe në rrethin shoqëror.
Erinda Caushi, përgjegjëse e komunikimit në Bankën e Shqipërisë sqaron se, në institucione financiare dhe në banka përdoret vlera reale e lekut.
Gabimet në përdorimin e terminologjisë së duhur kanë nisur 57 vite më parë kur u bë reforma monetare dhe u zëvendësua kartëmonedha në raportin 10 me 1.
Banka e Shqipërisë sygjeron që ndryshimi duhet të nisë nga edukimi i brezit të ri me terminologjinë e duhur. Të rinjtë e pranojnë se shpesh përdorin vlerën e gabuar të lekëve.
Përdorimi i gabuar i termave “i vjetër apo i ri” për të identifikuar “Lekun”, sipas Bankës Qendrore, shfaqet kryesisht te disa kategori te disa persona: të moshuarit, individët me nivel më të ulët arsimor, individët joaktivë në tregun e punës dhe ata me nivel të ulët të të ardhurave familjare.
Reforma që solli ngatërresën “leku i ri, leku i vjetër”
Pas një periudhe “stabiliteti” në vitin 1964 do të ndërmerrej sërish një lëvizje tjetër ligjore ku do të emëtohej ai që u emërtua si “leku i ri”. Në vitin 1965 do të emetohej leku i ri, që në thelb monedhave u hiqte një zero.
Për shkak të ngjashmërisë, në pamje, shqiptarët nuk do të ambientoheshin me ndryshimin e vlerës së kartëmonedhës e do të vijonin t’i emërtonin ato me vlerën e mëparshme, fenomen që vijon ende në ditët e sotme.
