Procesi i rivlerësimit të pasurive të paluajtshme me tatim 3% nga 15% që është në periudhë normale do të shtyhet deri më 30 prill 2022 dhe me mundësi pagese të tarifës deri në fund të korrikut 2022.
Afati i rivlerësimit përfundonte më 31 dhjetor 2021. Shtyrja e procesit është konsultuar me Ministrinë e Financave dhe Ekonomisë dhe sipas burimeve në Agjencinë Shtetërore të Kadastrës (ASHK) dhe aktorëve të tregut pritet t’i kalohet për miratim qeverisë.
Kjo është hera e katër që brenda një periudhe të shkurtër parashikohet të ndryshojë afati i përfundimit të procesit. Arsyeja e shtyrjes të afatit të rivlerësimit është interesi i lartë i qytetarëve.
