20.5 C
Tirana
Tuesday, August 16, 2022
spot_img
Faqe KryesoreLajmeAktualitetINSTAT: 11 mijë vdekje shtesë nga fillimi i pandemisë deri në shtator

INSTAT: 11 mijë vdekje shtesë nga fillimi i pandemisë deri në shtator

Që nga prilli 2020, kur vala e pandemisë filloi të jepte pasojat e para në Shqipëri, deri në fund të shtatorit 2021 në vend janë shënuar rreth 11 mijë vdekje shtesë në krahasim me mesataren e periudhave përkatëse 2016-2019.

INSTAT raportoi dje treguesit demografike për tremujorin e tretë 2021. Për periudhën korrik-shtator 2020, në vend janë regjistruar 6,037 humbje jete, nga 6,624 në të njëjtën periudhë të një viti më parë, me një rënie prej 8.9%.

PASOJAT AFATGJATA

Ndonëse pandemia është zbutur në muajt e verës, sërish humbjet e jetës vijojnë të jenë më të larta se tremujori i tretë i 2019-ës, kur ishte një periudhë normale. Në krahasim me mesataren 2016- 2019 të së njëjtës periudhë, rritja e vdekjeve është 22.2%. Mjekët shpjegojnë se përveç humbjeve të jetës, që janë të lidhura direkt me Covid-19, po konstatohen fatalitete te personat që e kanë kaluar infeksionin dhe që iu ka lënë pasoja të rënda në shëndet, duke u sjellë më pas vdekjen. Mjekët pohojnë se shumë pacientë po vuajnë simptoma të rënda pasi kanë kaluar Covid-19, ku më tipike është trashja e gjakut, që rrit probabilitetin për goditjet e lidhura më sëmundjet e aparatit të qarkullimit të gjakut. Një tjetër faktor lidhet me mosmarrjen e trajtimit në kohë për sëmundjet e tjera të rënda, apo mosidentifikimin e tyre në kohë, si rrjedhojë e problematikave që u shkaktuan nga karantina apo frika e njerëzve për të shkuar në spital.

Që nga fillimi i pandemisë (në 19 mars 2020 u raportua vdekja e parë) deri në 30 shtator 2021, Ministria e Shëndetësisë ka raportuar 2698 humbje jete nga Covid19, ose 4 herë më pak se shtesa e vdekjeve për të njëjtën periudhë.

SHTESA PËR 2021

Për gjithë 9-mujorin, në vend janë shënuar 21,471 humbje jete, me një rritje prej 18% në raport me të njëjtën periudhë të 2020-ës, për shkak të fataliteteve të larta që ndodhën sidomos në tremujorin e parë të këtij viti. Në krahasim me mesataren e 9 mujorit 2016-2019, fatalitetet në vend për janar-shtator 2021 janë rritur ndjeshëm me 31.6%. Vala më e rëndë e pandemisë është shënuar në fundin e 2020-ës dhe fillimin e 2021-shit. Sipas tremujorëve, shtesa më e lartë e jetëve të humbura ishte në tremujorin e katërt 2020 (+3,380) dhe të parin 2021 (+3,322). Pandemia filloi të japë pasoja në humbjen e jetëve që në tremujorin e tretë 2020 (+1,684), ndërsa efektet vijuan të ndiheshin dhe në prill-qershor të këtij viti (+729) dhe korrik-shtator (+1,097).

Sipas qarqeve, për 9- mujorin 2021, në krahasim me mesataren përkatëse 2016- 2019, rritja më e lartë e jetëve të humbura ishte në Tiranë (+44%), Fier (+40.3), Durrës (+33.7%), Lezhë (+31.8%).

 

 

spot_img

PËRGJIGJU

Ju lutemi shkruani komentin tuaj!
Ju lutem shkruani emrin tuaj këtu

REKLAME

spot_img

Me te lexuarat