Kompania daneze e bioteknologjisë “Bavarian Nordic” ka marrë Ok-in nga Komisioni Europian për të prodhuar vaksinën e saj “Imvanex”, e cila kuron linë e majmunëve.
Miratimi vjen vetëm pasi Organizata Botërore e Shëndetësisë lëshoi një alarm të nivelit të lartë duke shpallur shpërthimin e shpejtë të lisë së majmunëve si një emergjencë globale shëndetësore.
“Disponueshmëria e një vaksine të miratuar mund të përmirësojë ndjeshëm gatishmërinë e kombeve për të luftuar sëmundjet në zhvillim, por vetëm përmes investimeve dhe planifikimit të strukturuar“, tha shefi ekzekutiv i kompanisë daneze, Paul Chaplin.
Vaksina mori miratimin në Qershor edhe nga autoritetet shëndetësore në Shtetet e Bashkuara dhe Kanadaja. Por kompania nisi prodhimin teksa rastet me linë e majmunëve filluan që të përhapeshin me shpejtësi në Europë, pavarësisht se ende nuk e kishte marrë miratimin e plotë nga Komisioni Europian.
Kujtojmë se në muajin maj Gjermania kërkoi 40,000 doza të kësaj vaksine bavareze nordike për të qenë gati për të vaksinuar kontaktet e të infektuarve me linë e majmunëve nëse shpërthimi në vend bëhet më i rëndë.
Miratimi është i vlefshëm në të gjitha shtetet anëtare të Bashkimit Europian, si dhe në Islandë, Lihtenshtejn dhe Norvegji, ka bërë të ditur kompania në një deklaratë.
Për momentin shpërthimi i lisë së majmunëve është “i përqendruar midis burrave që kryejnë marrëdhënie seksuale me burra, veçanërisht atyre me partnerë të shumtë seksualë“.
Deri më tani ka pasur më shumë se 18,000 raste të lisë së majmunëve në më shumë se 75 vende dhe 5 vdekje në Afrikë.
