Klientët me pasuri të lartë (high-net-worth individuals) janë gjithnjë e më të shqetësuar për rrezikun kibernetik, por një pjesë e madhe e tyre vazhdon të refuzojë sigurimin personal kundër sulmeve kibernetike, edhe kur kjo mbulim është i disponueshëm dhe me kosto relativisht të përballueshme.
Sipas anketës RiskScan 2026, të zhvilluar me mbi 1.700 të anketuar në Shtetet e Bashkuara dhe Mbretërinë e Bashkuar nga Insurance Information Institute dhe Munich Re US, sigurimi ndaj rreziqeve kibernetike dhe përmbytjeve mbetet ndër boshllëqet më të mëdha në mbrojtjen financiare të individëve. Edhe pse konsumatorët janë të vetëdijshëm për këto rreziqe, niveli i sigurimit mbetet dukshëm më i ulët se shkalla e ndërgjegjësimit.
Ky paradoks bëhet edhe më shqetësues në një kohë kur ekspozimi ndaj krimit kibernetik po rritet ndjeshëm. Raporti i FBI-së për Krimin në Internet 2025 regjistroi për herë të parë mbi një milion ankesa, me humbje financiare që arritën në 20.877 miliardë dollarë, nga të cilat 17.697 miliardë dollarë lidhen me mashtrime të realizuara përmes teknologjive kibernetike.
Për herë të parë, raporti përfshiu edhe një seksion të dedikuar inteligjencës artificiale, duke evidentuar 893 milionë dollarë humbje të lidhura me mashtrime që përdorin AI. Klonimi i zërit dhe teknologjitë deepfake, të cilat imitojnë persona të besueshëm për të mashtruar viktimat, po krijojnë rreziqe të reja, veçanërisht për individët me pasuri të konsiderueshme dhe këshilltarët e tyre financiarë.
Jason Ott, president i Aon Private Risk Management, e konsideron këtë si një kontradiktë të qartë mes perceptimit të rrezikut dhe sjelljes së konsumatorëve.
“Shkalla e klientëve tanë që zgjedhin mbulimin kibernetik është më pak se 10%. Ne flasim vazhdimisht për këtë çështje dhe në sondazhet që zhvillojmë me klientët tanë më të mëdhenj i pyesim se çfarë i shqetëson më shumë. Rreziku kibernetik renditet pothuajse gjithmonë në vendin e parë ose të dytë. Megjithatë, kur u ofrojmë sigurimin, shumica vendosin të mos e blejnë.”
Mashtrimet me inteligjencë artificiale po e bëjnë rrezikun edhe më urgjent
Sipas Ott, sigurimi personal kibernetik është sot më i aksesueshëm se kurrë më parë. Ai mund të blihet si policë më vete ose të shtohet në sigurimin e banesës përmes një shtese në kontratë (endorsement). Në shumë raste ofrohen limite mbulimi prej 50.000 ose 100.000 dollarësh, ndërsa disa kompani sigurimi mund të ofrojnë deri në 1 milion dollarë, në varësi të profilit të klientit.
Megjithatë, kërkesa mbetet e ulët. Një nga arsyet kryesore, sipas Ott, është bindja e shumë amerikanëve se një sulm serioz kibernetik nuk do t’u ndodhë atyre ose se janë tashmë të mbrojtur nga shërbime të tjera, si kartat e kreditit.
“Ekziston një nivel vetëbesimi se nuk kemi nevojë për këtë mbulim ose se dikush tjetër do të kujdeset për ne. Shumë njerëz mendojnë se kanë një formë mbrojtjeje të lidhur me kartën e kreditit. Këto mbulime janë të dobishme, por shpesh nuk janë aq gjithëpërfshirëse sa ato që ofrohen për klientët me pasuri të lartë.”
Të dhënat federale tregojnë se pasojat financiare mund të jenë shumë të rënda. Vetëm gjatë vitit 2025, amerikanët mbi moshën 60 vjeç raportuan 7.7 miliardë dollarë humbje, rreth 59% më shumë se një vit më parë. Mbi 12.000 persona në këtë grupmoshë humbën secili më shumë se 100.000 dollarë nga mashtrimet kibernetike.
Edhe Federal Trade Commission raportoi një rekord prej 15.9 miliardë dollarësh humbje nga mashtrimet ndaj konsumatorëve gjatë vitit 2025, krahasuar me 12.5 miliardë dollarë një vit më parë.
Rritja e kostove të sigurimeve të pronës po shtyn klientët të heqin dorë nga mbulimi kibernetik
Një tjetër faktor që ndikon në shkallën e ulët të sigurimit është presioni financiar. Klientët me pasuri të lartë kanë përballuar prej disa vitesh rritje të konsiderueshme të primeve të sigurimit të pronës, veçanërisht në zonat e ekspozuara ndaj katastrofave natyrore.
Sipas Ott, kur një klient përballet me rritje vjetore prej 15% deri në 25% të primit të sigurimit të pronës për disa vite radhazi, është e vështirë ta bindësh të shtojë edhe disa qindra dollarë për sigurimin kibernetik.
Megjithatë, ai vëren se ritmi i rritjes së primeve të pronës po ngadalësohet dhe tashmë luhatet më shpesh mes 5% dhe 15%, gjë që mund t’u krijojë klientëve më shumë hapësirë për të rishikuar mbulimet që më parë i kishin refuzuar.
Në të njëjtën kohë, sigurimet e përgjegjësisë civile vijojnë të përballen me presione të forta. Sipas Ott, çmimet e sigurimeve të përgjegjësisë shtesë (excess liability) vazhdojnë të rriten si rezultat i inflacionit social, financimit të proceseve gjyqësore dhe vendimeve gjyqësore me dëmshpërblime gjithnjë e më të larta.
Swiss Re Institute vlerëson se kostot e dëmeve të përgjegjësisë civile në SHBA janë rritur me rreth 57% gjatë dekadës së fundit, ndërsa vendimet gjyqësore që tejkalojnë 10 milionë dollarë u rritën me 52% vetëm gjatë vitit 2024. Sipas Sedgwick, mesatarja e këtyre vendimeve tashmë kalon 51 milionë dollarë, duke ushtruar presion të vazhdueshëm mbi siguruesit për të rritur tarifat dhe kufijtë e mbulimit.
Hendeku mes perceptimit dhe realitetit
Në përfundim, ekspertët vlerësojnë se tregu i klientëve privatë po ndryshon me shpejtësi, ndërsa pasuria dhe ekspozimi ndaj rreziqeve po rriten më shpejt sesa gatishmëria për t’u siguruar.
Edhe studimi i Munich Re për vitin 2026 evidenton ekzistencën e një “hendeku perceptimi”, ku individët vazhdojnë të nënvlerësojnë pasojat e sulmeve kibernetike, pavarësisht rritjes së vazhdueshme të incidenteve dhe dëmeve financiare.
Jason Ott paralajmëron se problemi mund të bëhet shumë më serioz në rast të një sulmi të madh kibernetik.
“Ajo që më shqetëson vërtet është mundësia që Shtetet e Bashkuara të përballen me një sulm kibernetik në shkallë të gjerë që prek një numër shumë të madh individësh. Në atë moment, kapaciteti i tregut të sigurimeve mund të mos jetë më i disponueshëm.”
Ky artikull është pronësi intelektuale e Insurance Business, Sigurime.Online, për lexuesit, e solli në shqip këtë artikull.
