Aktiviteti i shërbimeve shihet të ketë pësuar ndryshime pozitive edhe për tremujorin e tretë të vitit 2021, krahasuar më një vit më parë, gati në të gjithë treguesit e tij.
Të dhënat e Institutit të Statistikave sinjalizonin se, edhe gjatë tremujoroit të dytë, aktivitetet e shërbimeve paraqiteshin me rritje.Hotelet dhe agjencitë e udhëtimit kanë qenë ndër aktivitetet më të goditura nga pandemia, por indekset e treguesve për këto aktivitete në tremujorin e tretë të vitit 2021, tregojnë rritje.
Të dhënat sinjalizojnë se sektori i hoteleve ka rritje të shitjeve neto, me 123.8% dhe kjo është dhe rritja më e lartë nga të gjthë treguesit e tjerë. Indeksi i numrit të të punësuarve ka shënuar rritje, me 36.6%, krahasuar më të njejtën periudhë të një viti më parë. Rritje po ashtu ka pësuar dhe fondi i pagave për këtë sektor, me 61.4%, e cila po ashtu është dhe rritja më e madhe e këtij indeksi për të gjithë sektorët.
Agjencitë e udhëtimit, po ashtu, paraqesin një rritje të lartë të shitjeve neto me 109.1%, e cila është dhe shifra e dytë më e lartë për këtë indeks. Rritje paraqesin dhe indeksi i numrit të të punësuarve me 10.9% dhe fondi i pagave me 14.4%
Indekset e treguesve në aktivitetin “Tregti”, e cila përfshin tregti me shumicë, tregti me pakicë dhe riparimi i automjeteve dhe motoçikletave, në tremujorin e tretë 2021 ka pësuar rritje me 11.45 në indeksin e shitjeve neto, me 2.9% në atë të numrit të punësuarve dhe me 19.7% në fondin e pagave.
Po ashtu rritje kanë shënuar dhe indekset e “Transport, Magazinim dhe Postë” ku rritjen më të madhe e regjistron indeksi i shitjeve neto me 66.5%. Sa i përket indeksit të numrit të të punësuarve dhe fondit të pagave rritjet janë me 5.2% dhe 19.6% përkatësisht.
