Sipas një raporti të fundit nga kompania ndërkombëtare Mordor Intelligence, tregu i sigurimeve në Singapor po rritet me një normë vjetore shumë të lartë: 10.6% deri në vitin 2030.
Studimi mbulon periudhën 2015–2030 dhe merr si bazë vitin 2024.
Madhësia e tregut ishte 6.23 miliardë dollarë në 2025 dhe pritet të arrijë në 10.32 miliardë në vitin 2030.
Skema e industrisë
Pesë kompanitë kryesore që dominojnë tregun janë: Prudential, Great Eastern, Income Insurance, AIA dhe Manulife.
Income Insurance fillimisht ishte kooperativë e krijuar në vitin 1970 nën NTUC. Në vitin 2022 u kthye në shoqëri aksionare publike. Asetet e saj janë 47.2 miliardë dollarë.
Prudential është një kompani britanike me histori që nga viti 1848 dhe me prani në disa kontinente.
Great Eastern vepron në Singapor dhe Malajzi dhe është pjesë e OCBC, një grup bankar shumëkombësh me seli në Singapor.
Manulife është kompani kanadeze me seli në Toronto, e pranishme në Azi dhe Amerikën e Veriut.
AIA, me seli në Hong Kong, është themeluar më 1919 dhe është grupi më i madh i sigurimeve të jetës në bursën e Azisë-Paqësorit.
Përveç këtyre, në treg janë aktivë edhe operatorë të rinj që përdorin teknologji të re për të zhvilluar sigurimet.
Përqendrimi i tregut është i nivelit mesatar, që do të thotë se 3 deri në 5 kompani zotërojnë rreth 40–60% të tregut. Tregu nuk dominohet nga një kompani e vetme, por as nuk është shumë i shpërndarë.
Arsyet e shëndetit të mirë të industrisë
Ka tre arsye kryesore pse tregu i sigurimeve në Singapor është i shëndetshëm: (1) rritja e mbulimit të detyrueshëm shëndetësor, (2) digjitalizimi i shpejtë dhe (3) rritja e vazhdueshme e pasurisë së qytetarëve.
Gjithashtu, sigurimet e jo-jetës po performojnë mirë, shteti jep grante për fintech dhe nevojat për pension po shtohen. Këto kanë ndihmuar në rritjen e vëllimit të primeve.
Roli i Insuretech, teknologjisë në sigurime
Insuretech në rastin e Singaporit ka një rol kyç.
Ajo përdor: inteligjencë artificiale për analizë rreziku, aplikacione mobile për blerje e deklarim dëmesh, blockchain për siguri, telematikë për monitorim në sigurimet e makinave dhe chatbot për ndihmë automatike 24/7.
Insuretech po ndihmon kompanitë tradicionale të përmirësojnë shërbimet, por edhe u jep mundësi startup-eve të sjellin forma të reja sigurimi, më të lira dhe më të thjeshta.
Në Singapor, startup-et e sigurimeve digjitale përfitojnë nga rregulloret eksperimentale të quajtura “sandbox regulatory”.
Ato lejojnë testimin e produkteve të reja pa ndjekur menjëherë të gjitha rregullat.
Në këtë mënyrë, siguruesit privatë mund të përfitojnë edhe nga kufizimet e mbulimit shtetëror të MediShield Life, duke ofruar produkte plotësuese.
Singapori njihet si një “sandbox” global për fintech.
Ai ofron licenca të thjeshtuara dhe bashkëfinancim për start-up-et, duke ulur barrierat.
Rrjetet digjitale në shtrirje
Konsumatorët në Singapor preferojnë blerjen e policave online, pa ndërprerje dhe në celular, sidomos për automjete, udhëtime dhe aksidente. Kjo lidhet me përdorimin e gjerë të internetit dhe pagesave elektronike.
Shpërndarësit digjitalë po zënë gjithnjë e më shumë terren.
Ata po zëvendësojnë agjentët tradicionalë dhe kanë filluar të ulin ndjeshëm kostot e përvetësimit të klientëve në sigurimet e jetës dhe ato jo të jetës.
Rrjetet tradicionale mbanin 38.24% të tregut, por kjo pjesë po zvogëlohet.
