Komisioni Europian publikoi të premten udhëzime të reja për të ndihmuar modelet e inteligjencës artificiale (IA) që konsiderohen me rrezik sistemik të përmbushin kërkesat e rregullores së re të Bashkimit Europian, të njohur si Akti për IA (AI Act).
Ky hap synon të përgjigjet ndaj kritikave nga disa kompani për barrën rregullatore që sjell ligji, por edhe të ofrojë më shumë qartësi për bizneset.
Shkeljet e rregullores mund të ndëshkohen me gjoba që variojnë nga 7.5 milionë euro ose 1.5% e xhiros, deri në 35 milionë euro ose 7% të xhiros globale.
Akti për IA, që u bë ligj vitin e kaluar, hyn në fuqi më 2 gusht 2025 për modelet me rrezik sistemik dhe për modelet themelore, si ato të prodhuara nga Google, OpenAI, Meta, Anthropic dhe Mistral.
Kompanitë kanë afat deri më 2 gusht 2026 për të përmbushur plotësisht kërkesat.
Komisioni e përkufizon një model IA me rrezik sistemik si një teknologji shumë e avancuar që mund të ndikojë ndjeshëm në shëndetin publik, sigurinë, të drejtat themelore ose shoqërinë.
Këto modele do të duhet të kryejnë vlerësime të riskut, testime të qëllimshme për cenueshmëri, të raportojnë incidente serioze dhe të sigurojnë mbrojtje të mjaftueshme kibernetike ndaj vjedhjes dhe keqpërdorimit.
Ndërkohë, modelet e përgjithshme të inteligjencës artificiale (GPAI), që përdoren për shumë qëllime, do të kenë detyrime për transparencë.
Ato duhet të hartojnë dokumentacion teknik, të zbatojnë politika për të drejtat e autorit dhe të japin përmbledhje të detajuara mbi përmbajtjen e përdorur për trajnimin e algoritmeve.
