Në vitin 2026, sigurimi shëndetësor përmes platformës së Obamacare pritet të kushtojë mesatarisht 75% më shumë për përdoruesit, sipas një analize të organizatës kërkimore KFF.
Arsyeja kryesore: mbarimi i subvencioneve të shtuara federale që u miratuan gjatë pandemisë për të ulur kostot për qytetarët që nuk kanë sigurim nga punëdhënësi dhe nuk kualifikohen për Medicare apo Medicaid.
Ky ndryshim pritet të sjellë një rritje të ndjeshme të primit mujor – për shembull, një person që këtë vit paguan 60 dollarë, vitin tjetër mund të përballet me një faturë prej 105 dollarësh në muaj.
Ndërsa kompanitë e sigurimit justifikojnë rritjen me faktin se tregu do të mbetet me më pak persona të shëndetshëm dhe më shumë persona me sëmundje kronike, rreziku më i madh është largimi i qytetarëve të shëndetshëm nga tregu, të cilët mund të vendosin të mos blejnë sigurim fare.
Zyrtarët e KFF paralajmërojnë se ky ndryshim do të çojë në një rritje të pabarazisë në qasjen ndaj kujdesit shëndetësor dhe në më shumë qytetarë të pambrojtur ndaj kostove mjekësore të papritura.
Sipas vlerësimeve të Zyrës së Buxhetit të Kongresit (CBO), deri në 8.2 milionë njerëz mund të humbasin sigurimin për shkak të mbarimit të subvencioneve dhe reformave të reja të mbështetura nga administrata Trump dhe Kongresi republikan.
Ironikisht, shumë nga këta qytetarë që përfituan gjatë pandemisë janë nga shtete konservatore si Teksasi, Florida dhe Georgia.
Tani, ata rrezikojnë të përjashtohen nga sistemi për shkak të çmimeve më të larta.
