Pasiguria gjeopolitike nga lufta tregtare me tarifa ka ndikuar negativisht te pritshmëritë për rritjen ekonomike.
Kjo vlen veçanërisht për vendet që varen nga tregtia ndërkombëtare, si SHBA, Kina, Gjermania dhe Japonia.
Si pasojë, janë ulur edhe parashikimet për rritjen e aktivitetit të sigurimeve, duke zbehur pritjet pozitive të fillimit të vitit.
Pavarësisht kësaj pasigurie, rritja ekonomike dhe normat e interesit do të vazhdojnë të nxisin zhvillimin e industrisë së sigurimeve në mbarë botën.
Kjo industri pritet të mbetet e qëndrueshme, si në sigurimet e jetës, ashtu edhe ato jo të jetës. Megjithatë ka pasiguri në rritje për ritmin e rritjes së primeve, inflacionin, normat e interesit dhe luhatjet në tregjet financiare.
Në Eurozonë, parashikimet tregojnë se ekonomia gjermane do të ngecë këtë vit.
Rritja në Francë dhe Itali do të jetë e dobët.
Si rezultat, janë ulur pritshmëritë për sigurimet në këto tregje.
Një përmirësim i lehtë pritet vitin tjetër, pasi Banka Qendrore Evropiane pritet të vazhdojë politikat lehtësuese monetare, në kushtet e një inflacioni në rënie.
Spanja përjashtohet nga ky trend.
Ajo pritet të ketë rritje më të lartë se vendet e tjera të Eurozonës.
Kjo përmirëson pritshmëritë për tregun e saj të sigurimeve. Po ashtu, fitimet në sektorin e sigurimeve pritet të mbeten të larta, falë inflacionit që bie dhe normave të interesit ende pozitive.
Disa ekonomi në zhvillim pritet të preken më shumë nga tarifat tregtare.
Ekonomia e Meksikës pritet të ngadalësohet më shumë se sa mendohej në fillim të vitit. Rritja do të jetë e dobët, por nuk do të ketë recesion.
Aktiviteti i sigurimeve në Meksikë pritet të rritet më shumë se PBB-ja. Fitimet në sigurimet e jetës dhe jo të jetës do të jenë të forta. Kjo për shkak të normave reale pozitive të interesit dhe inflacionit të kontrolluar.
Brazili dhe Turqia pritet të preken më pak. Parashikimet për rritjen ekonomike nuk kanë ndryshuar shumë.
Të dy vendet pritet të kenë rritje të fortë në tregjet e sigurimeve. Kjo vjen nga kërkesa më e madhe, për shkak të përhapjes ende të ulët të sigurimeve.
Po ashtu, të ardhurat financiare do të vazhdojnë të ndihmojnë fitimet në sektorin e sigurimeve dhe në sigurimet e jetës të lidhura me kursimet. Kjo për shkak të normave të larta të interesit, që janë më të larta se inflacioni i pritur.
