Ndryshimet klimatike janë realiteti i përditshëm i shoqërisë dhe ekonomisë evropiane. Më poshtë do të sjellim përmbledhurazi një reflektim-qëndrim zyrtar të Insurance Europe në lidhje me rolin e industrisë së sigurimeve përballë katastrofave natyrore.
Përballë këtyre sfidave, sektori i sigurimeve ndodhet në vijën e parë, duke ofruar mbrojtje ndaj pasojave të motit ekstrem dhe duke ndihmuar qytetarët dhe bizneset të përshtaten me një botë gjithnjë e më të pasigurt.
Si përfaqësues i industrisë së sigurimeve në nivel evropian, Insurance Europe, në raportin e vitit 2024-2025 thekson se adresimi i rrezikut klimatik kërkon një qasje të përbashkët, të koordinuar dhe të mirëstrukturuar mes sektorit publik dhe atij privat.
Ngjarjet ekstreme si stuhitë, përmbytjet, thatësirat dhe valët e të nxehtit po bëhen më të shpeshta dhe më intensive, duke vënë në rrezik jetë njerëzish, pasuri, infrastrukturë dhe stabilitet ekonomik.
Që nga viti 2020, humbjet e mbuluara nga sigurimet kanë kaluar 100 miliardë dollarë në vit, dhe parashikohet që në vitin 2025 ato të kalojnë 200 miliardë.
Vetëm në vitin 2024, për herë të parë, temperatura mesatare globale ka tejkaluar kufirin 1.5°C mbi nivelet para-industriale – një sinjal alarmi për të gjithë aktorët ekonomikë dhe politikë.
Në këtë kontekst, siguruesit luajnë një rol të pazëvendësueshëm si vlerësues të rrezikut dhe financues afatgjatë i qëndrueshmërisë.
Por mbajtja e sigurimeve të përballueshme për qytetarët dhe bizneset – sidomos në zona më të ekspozuara ndaj rreziqeve natyrore – bëhet gjithnjë e më sfiduese. Qëndrueshmëria afatgjatë e këtij modeli varet nga angazhimi i përbashkët për adaptim ndaj klimës dhe për zbutjen e ndikimeve të saj.
Në dokumentin që referuam më sipër, Insurance Europe thekson se forcimi i rezistencës së shoqërisë ndaj motit ekstrem kërkon një paketë të integruar masash:
politika publike të mirëqena,
inovacion nga sektori privat dhe
përfshirje aktive të qytetarëve.
Siguruesit mund të kontribuojnë jo vetëm duke ofruar mbulim financiar, por edhe duke ndikuar në sjellje përmes çmimit të riskut, duke nxitur investime në infrastrukturë të qëndrueshme dhe duke orientuar kapitalin drejt zgjidhjeve afatgjata dhe të përgjegjshme.
Në këtë drejtim, partneritetet publike-private përbëjnë një mekanizëm efektiv, për sa kohë janë të dizajnuara qartë, me ndarje të saktë përgjegjësish ndërmjet aktorëve dhe me synim parandalimin, jo vetëm reagimin pas katastrofave.
Duke njohur natyrën ndërkufitare të rreziqeve klimatike dhe shkallën e sfidës, Insurance Europe përshëndet përpjekjet e Bashkimit Evropian për të eksploruar zgjidhje në nivel supranacional.
Megjithatë, çdo nismë e re duhet të ndërtohet mbi sistemet ekzistuese kombëtare, të respektojë qasjet e përshtatura sipas kontekstit dhe të mos rrezikojë partneritetet publike-private që funksionojnë me sukses në shumë vende anëtare.
Iniciativat e BE-së duhet të jenë të bazuara mbi rrezik real, të përfshijnë stimuj që inkurajojnë reduktimin e riskut dhe të sigurojnë që përgjegjësitë të shpërndahen në mënyrë të drejtë mes publikut dhe sektorit privat.
Në përfundim, për Insurance Europe, sigurimet janë më shumë sesa një produkt financiar: ato janë një mekanizëm kyç në arkitekturën e qëndrueshmërisë evropiane.
Me mbështetjen e duhur politike dhe me një kornizë bashkëpunuese, sektori i sigurimeve është i gatshëm të jetë një motor i investimeve të gjelbra, mbrojtjes sociale dhe stabilitetit ekonomik përballë një klime në ndryshim të shpejtë.
