Në Progres Raportin për Shqipërinë, Komisioni Evropian ka vlerësuar në veçanti miratimin e ligjit “Për sigurimin e detyrueshëm në sektorin e transportit”.
Në gjetjet e Kapitullit 9-të “Shërbimet Financiare”, raporti nënvizon se “është bërë progres në lidhje me rekomandimet e vitit të kaluar përmes miratimit të ligjit për sigurimin e detyrueshëm në sektorin e transportit”.
Më tej, raporti thekson se ligji i cili hyri në fuqi në korrik 2021 është në përputhje me legjislacionin e BE-së. Dokumenti përmend gjithashtu masat e marra nga Autoriteti për të garantuar stabilitetin financiar të tregjeve në kuadër të pandemisë COVID-19, duke veçuar vendimin e Bordit për pezullimin e shpërndarjes së fitimit të vitit 2020 nga shoqëritë e sigurimit, në formën e dividendit apo në çdo formë tjetër pagesash.
Në lidhje me infrastrukturën e tregut financiar, konstatohet se Bursa Shqiptare e Titujve vijon të operojë vetëm me tregtimin e titujve qeveritarë. Gjithashtu, theksohet se Regjistri Shqiptar i Titujve (ALREG) plotëson infrastrukturën e pastregtimit, përmes klerimit/shlyerjes së titujve joqeveritarë.
Në dokument përmenden në veçanti ligjet e reja të miratuara për tregjet e kapitalit, sipërmarrjet e investimeve kolektive dhe tregjet financiare të bazuara në regjistrat e shpërndarë. Progres Raporti konstaton se në zbatim të ligjit për sipërmarrjet e investimeve kolektive, janë miratuar aktet nënligjore për investimet kolektive, rastet e pezullimit, menaxhimit të rrezikut dhe procedurat e licencimit.
Gjithashtu është miratuar ligji për tregjet e kapitalit, shoqëruar me 5 rregullore në zbatim të tij.
Këto akte përafrojnë pjesërisht kuadrin ligjor të Shqipërisë me Direktivën MiFID II dhe legjislacionin e BE-së për transparencën, manipulimin e tregut, prospektet, mbi shlyerjen dhe depozitarët qendrorë të titujve.
AMF është institucioni që drejton dhe koordinon punën në funksion të plotësimit të rekomandimeve për Kapitullin 9 “Shërbimet Financiare”. Drejtori i Përgjithshëm Ekzekutiv, z. Ervin Mete, ushtron funksionin e negociatorit për këtë kapitull.
