Mjekët okulistë ngrenë shqetësimin e rritjes se numrit të personave adultë mbi 18 vjeç, që kanë problematika me shikimin.
Kjo gjë, sipas okulistes Suzana Zhuka në poliklinikën qendrore, u vu re nga kontrolli i syve për personat që e kanë deyrim për t’u pajisur me patentë, sidomos gjatë fluksit të madh të aplikantëve në periudhën që u fol për rritje të çmimit të kursit të patentës.
“25-30% e personave dilnin me anomali, 18-25 vjeç këto janë më shumë se moshat e rritura janë super të rregullt. Ato e kanë kryer vizitën, vijnë me syze”, thotë mjekja për TV Klan.
Sipas mjekes, shpesh herë hasin dhe në mospranimin e problemit sidomos nga të rinjtë, sepse nuk duan që në formularin e patentës të shënohet se duhen syze.
“Mendoj që ka të bëjë me kompleksitetin që kemi ne si shoqëri, më shumë te djemtë që nuk duan të mbajnë syze”.
Mjekja bën apel për kryerjen në moshë të hershme të kontrollit të syrit, pasi disa lloj defektesh nuk mund të korrigjohen nëse nuk kapen në kohë.
“Këto qytetarë duhet ta kishin kryer përpara vizitën, pra vijnë me vonesë. Këto probleme duhet të kapen shumë më herët që të korrigjohet”.
Përdorimi i teknologjisë është një ndër faktorët kryesorë për dëmtimin e shikimit që në moshat e hershme. Ndaj mjeka u bën apel prindërve që të mos i lënë fëmijëve të shohin telefona minimalisht deri në 3 vjeç.
