Skema e pensioneve private po bëhet tërheqëse për qytetarët shqiptarë.
Gjatë 3 muajve të parë të këtij viti shumë persona kanë zgjedhur të kontribuojnë për të qenë pjesë e skemës së pensioneve vullnetare private.
Edhe pse njihet pak si skemë dhe shumë njerëz stepen, gjatë periudhës janar-mars totali i kontributeve ka arritur në vlerën 5.9 miliardë lekë ose 52.69 milionë euro.
Nëse bëjmë një krahasim me fundin e vitit 2022 rritja e aseteve rezulton se ka pësuar një rritje me gati 5%.
Sipas të dhënave të Autoritetit të Mbikqyrjes Financiare, numri i anëtarëve në fondet e pensioneve private në fund të marsit ishte mbi 37 mijë persona.
Viti i kaluar pati gjithashtu një ecuri pozitive përsa i përket personave që kanë kontribuar në skemat e pensioneve private duke u shtuar me 5,500 anëtarë.
Por pavarësisht kësaj tendence pjesëmarrja e qytetarëve shqiptarë në skemën e pensioneve private vlerësohet ende e ulët.
Aktualisht në këtë skemë janë më pak se 3% e forcave të punës.
Aktualisht, Autoriteti i Mbikqyrjes Financiare dhe aktorët në treg kanë ndërmarrë disa ndryshime ligjore që synojnë nxitjen e kësaj skemë, ndërhyrjet synojnë të ulin tarifat në rastet kur fondi tërhiqet me këste.
Skema e pensioneve private mbetet ende e panjohur për shoqërinë ndërsa ofron një mundësi për rritje reale të pensioneve, nga pikëpamja e të ardhurave.
Ndër të tjera paratë e investuara në fondet private të pensioneve nuk humbasin, ato trashëgohen nga pasardhësit, ndryshe nga pensioni shtetëror që pushon së ekzistuari me humbjen e jetës së pensionistit.
