Kredia e re për muajin gusht fiksohet pranë 27 miliardë lekëve, që përkthehet në rreth 235 milionë euro. Kjo shifër është më e larta e regjistruar ndonjëherë gjatë gushtit, të paktën që prej vitit 2015, kur edhe të dhënat janë publike. Gushti është një prej muajve që historikisht është karakterizuar nga një kërkesë e ulët për financim.
Kreditimi gjatë gushtit të këtij viti rezulton të jetë rreth 23% mbi mesataren historike të muajit.
Shifrat zyrtare nga Banka e Shqipërisë të analizuara dhe përpunuara nga “Scan Intel” konfirmojnë edhe njëherë rolin e sektorit bankar në mbarëvajtjen e ekonomisë në këto kohë aspak të lehta, gjë të cilën vetëm një ditë më parë e konfirmonte edhe raporti i BERZH në lidhje me ekonominë shqiptare.
Rritja e ndjeshme e kreditimit gjat gushtit në terma vjetorë nuk ka qenë e njëjtë për bizneset, ashtu si për individët. Për sektorin privat jo financiar, shifrat flasin për një nivel të lartë kreditimit, por jo për një rekord.
Në gusht të këtij viti janë dhënë nga bankat rreth 20.1 miliardë lekë kredi e re, që është ndjeshëm mbi nivelin e gushtit të vitit të kaluar, kur fiksohej pranë rreth 14 miliardë lekëve, por më pak se gushti i vitit 2018, kur kjo shumë fiksohej në 21 miliardë lekë.
Ky vit vijon të mbajë rekordin e kreditimit të biznesit sa i përket muajit gusht, sinjalizojnë shifrat zyrtare nga banka e Shqipërisë.
Në drejtim të individëve ndërkohë, shifrat flasin për rreth 7.2 miliardë lekë kredi të re gjatë gushtit. Shifra përbën një rekord në terma vjetorë, dhe rezulton të jetë rreth 45% mbi mesataren historike të muajit gusht, të paktën që prej vitit 2015-të. Kredia për blerje banesash nga individët duket se vazhdon të udhëheqë tendencën. Pavarësisht se vihet re një rënie e vogël e vrullit të muajve të mëparshëm, kryesisht efekt sezonal, kredia e re për blerje banese këtë gusht regjistron gjithashtu një rekord të ri, si në euro, ashtu edhe në lekë. Rreth 3.88 miliardë lekë regjistrohet kredia e re për blerje banese gjatë gushtit për të dyja valutat. Mesatarja historike e muajit gusht, që karakteriohet nga një kërkesë e ulët për këtë segment të kredisë, fiksohet pranë diçka më shumë se 2 miliardë lekë. Pra, këtë vit, gjatë gushtit kjo kredi ka pësuar një rritje me rreth 88% krahasuar me mesataren historike.
Këto shifra janë në linjë edhe me raporte të ndryshme, si brenda edhe jashtë vendit. Banka e Shqipërisë në vrojtimet periodike ka nënvizuar vazhdimisht se bankat nuk do të shtrëngojnë kushtet dhe standarded e kreditimit për individët, pasi ka konkurrencë në treg dhe pasi ndërtimi është në vrull, por se nga ana tjetër do të ketë një lloj shtrëngimi për biznesin, sidomos sa i përket financimit për investime. /SCAN INTEL
LEXO EDHE: A më duhet “Sigurimi i Shtëpisë” nëse nuk kam më një kredi?
LEXO EDHE: Pse shqiptarët ia besojnë pronën e tyre SIGAL UNIQA-s
