Qëndrim i përbashkët: Koha që Europa të shfrytëzojë plotësisht potencialin e sigurimeve

Deklaratë e publikuar më 28 maj 2025 përpara Konferencës së 15-të Ndërkombëtare nga Frédéric de Courtois, president i Insurance Europe, Alexander Sarrigeorgiou, nënkryetar dhe Thea Utoft Høj Jensen, drejtoreshë e përgjithshme.

Sektori europian i sigurimeve është një shtyllë e rëndësishme e rritjes ekonomike të kontinentit dhe një mbrojtës i jetës dhe pronës së qytetarëve dhe bizneseve.

Pavarësisht krizave të shumta në vitet e fundit, sektori ka mbetur i qëndrueshëm dhe konkurrues globalisht.

Siguruesit europianë punësojnë mbi 920 000 vetë dhe menaxhojnë 9.5 trilionë euro asete, prej të cilave 70% janë investuar në BE.

Vetëm në vitin 2023, ata kanë paguar mbi 1 000 miliardë euro dëme – rreth 2.8 miliardë euro në ditë.

Sektori i sigurimeve është gati të ndajë njohuritë dhe përvojën me institucionet europiane dhe shoqërinë civile për të ndihmuar në përmbushjen e objektivave të BE-së.

Ai nuk është pjesë e problemit, por pjesë e zgjidhjes për sfidat me të cilat përballet Europa.

Pesë përparësitë kryesore të industrisë së sigurimeve:

1. Rikthimi i konkurrueshmërisë së BE-së. Komisioni Europian nën udhëheqjen e Ursula von der Leyen ka nisur një plan për thjeshtimin e rregullave dhe rritjen e konkurrueshmërisë. Objektivat e “Busullës së Konkurrueshmërisë” mund të ndikojnë realisht në ekonominë europiane, nëse zbatohen në praktikë.

2. Bashkimi i Kursimeve dhe Investimeve. Europa ka nevojë për më shumë investime afatgjata për tranzicionin klimatik dhe dixhital. Siguruesit mbështesin krijimin e planeve kolektive të pensioneve me regjistrim automatik dhe skemave tërheqëse për kursime individuale, të përshtatura me realitetet kombëtare. Një qasje gjithëpërfshirëse do të përmirësonte pensionet dhe do të fuqizonte ekonominë.

3. Përballja me ngjarjet ekstreme klimatike. Sektori kërkon bashkëpunim më të fortë me autoritetet publike për menaxhimin e rreziqeve klimatike. Siguruesit ofrojnë ekspertizë për planet e menaxhimit të krizave dhe për masat e përshtatjes. Ata janë gati të punojnë me Komisionin Europian për Planin e ri të Përshtatjes Klimatike.

4. Inovacioni dhe inteligjenca artificiale. Teknologjitë e reja mund të përmirësojnë përvojën e klientit, përpunimin e dëmeve dhe vlerësimin e rrezikut. Rregulloret duhet të testohen përpara zbatimit, për politika më efektive.

5. Dialog më i fortë me konsumatorët dhe shoqërinë civile. Ky dialog ndihmon në kuptimin e nevojave të ndryshuara dhe ofrimin e shërbimeve më të mira, me çmime të përballueshme.

Përballja me këto sfida nuk është vetëm çështje mbrojtjeje sociale, por edhe çështje konkurrueshmërie ekonomike dhe qëndrueshmërie europiane.

Industria e sigurimeve ka mundësi reale për të kontribuar, nëse institucionet e BE-së e përkthejnë vizionin në veprim.

Le të punojmë së bashku për të përmbushur objektivat ambicioze të Europës.