Shqetësimet po shtohen në Spanjë për përhapjen e virusit të Nilit Perëndimor pas dy vdekjeve të tjera në Sevilje, duke e rritur numrin e përgjithshëm të vdekjeve.
Sipas autoriteteve, numri i përgjithshëm i vdekjeve ka shkuar në 5, me 10 persona të tjerë që vlerësohet të jenë të infektuar me virusin.
Mushkonjat infektive janë gjetur në qytete pranë lumit Guadalquivir, duke përfshirë Coria del Río.
Në fillim të këtij muaji, banorët e qytetit mbajtën një demonstratë, duke i kërkuar qeverisë të marrë masa më efektive për të ndaluar infeksionin.
Sezoni i virusit të Nilit Perëndimor është në pikën kulminante, thotë agjencia evropiane e shëndetit publik.
Sipas Organizatës Botërore të Shëndetësisë (OBSH), 80 për qind e të infektuarve mbeten asimptomatikë dhe është e rrallë që sëmundja të përparojë në një formë më të rëndë.
OBSH thotë se individët mbi 50 vjeç dhe ata me sistem imunitar të dobësuar janë në rrezik më të lartë.
Virusi është më i zakonshëm te zogjtë, por njerëzit dhe kafshët mund të infektohen edhe nga pickimi i mushkonjave.
Ekspertët rekomandojnë që banorët e zonave të prekura të mbrohen nga pickimi i mushkonjave duke përdorur ilaçe kundër insekteve, duke veshur këmisha dhe pantallona me mëngë të gjata dhe duke qëndruar në ambiente të mbyllura gjatë muzgut dhe agimit kur aktiviteti i mushkonjave është më i lartë.
