Ndërsa dimri po afron alarmi për krizën ushqimore në Korenë e Veriut rritet dita ditës.
Dezertorët me bazë në Korenë e Jugut thonë se familjet e tyre në veri janë të uritura. Ekziston një shqetësim me afrimin e dimrit, ku më të dobëtit mund të vdesin nga uria.
“Probleme të tilla si më shumë fëmijë jetimë në rrugë dhe vdekje nga uria po raportohen vazhdimisht,” tha Lee Sang Yong, kryeredaktore e Daily NK, e cila ka burime në Korenë e Veriut, shkruan BBC.
“Klasat e ulëta në Korenë e Veriut po vuajnë gjithnjë e më shumë”, pasi mungesat e ushqimit janë më keq se sa pritej, tha Lee.
Marrja e informacionit nga Koreja e Veriut është gjithnjë e më e vështirë. Kufiri është mbyllur që nga janari i vitit të kaluar për të parandaluar përhapjen e Covid-19 nga Kina.
Edhe marrja e mesazheve nga vendi për familjen dhe miqtë që kanë dezertuar në Korenë e Jugut është një rrezik i madh.
Kushdo që kapet me një telefon celular të paautorizuar dënohet.
