Ditën e sotme priten reshje shiu në të gjithë territorin e vendit, por reshje me intensitet të lartë deri dhe në formën e shtrëngatave priten në qendër dhe në jug.
Kështu bën me dije Shërbimi Meteorologjik Ushtarak, ndërsa në zonat malorë pritet të ketë reshje në formën e dëborës me intensitet të ulët në zonën e Alpeve dhe verilindja.
“Gjatë 24 orëve të fundit sasia më e lartë e reshjeve është regjistruar në qytetin e Lezhës dhe të Sarandës me 35mm reshje shiu. Në lartësinë mbi 1500 metra në verilindje dhe juglindje reshjet kanë qenë në formën e dëborës me intensitet të ulët.
Ditën e Diel pritet që reshjet e shiut deri në orët e mesditës të jenë më intensitet të ulët e gradualisht të fitojnë intensitet mesatar e lokalisht në qendër e në jug të vendit me intensitet deri të lartë në formën e shtrengatave shoqëruar me shkarkesa elektrike por afatshkurtra.
Në majat e maleve në zonat malore reshjet pritet të jenë në formën e dëborës me intensitet të ulët në zonën e Alpeve dhe verilindje. Era do të jetë nga kuadrati i jugut me shpejtësi mesatare deri në 7m/s, ndërsa përgjatë vijës bregdetarë dhe lugina era fiton shpejtësi 8-12 m/sek shoqëruar me valëzim në dete të forcës 1-2 ballë”, njofton SHMU.
