Janë ditët e fundit të vitit dhe shumë persona planifikojnë ta kalojnë atë në shtëpi, në lokale e restorante brenda vendit por ka edhe nga ata që duan të udhëtojnë jashtë vendit.
Europa ka shumë alternativa, disa të lira, mesatare por dhe shumë të shtrenjta.
Instituti i Statistikave në Europë, Eurostat, ka publikuar indeksin e çmimeve të restoranteve dhe hoteleve, të matura sipas fuqisë blerëse, ku si bazë krahasimi merret mesatarja e Bashkimit Europian (BE=100).
Shteti më i shtrenjtë në Europë është Zvicra, ku hotelet dhe restorantet kushtojnë sa 168% e mesatares europiane. Shpenzimet nominale për banor për hotele e restorante në vitin 2021, sipas Eurostat, në Bashkimin Europian ishin 1067 euro, ndërsa në Zvicër i kalojnë 2,200 euro.
Në nivele të ngjashme me Zvicrën janë dhe shtetet nordike dhe Islanda, ku duhet të paguani 32-66% më shumë sesa mesatarja e Bashkimit Europian.
Më shumë sesa mesatarja duhet të paguani edhe në Belgjikë (123%), Francë (121%), apo Austri ( 116%).
Në Itali, Angli, apo në Gjermani, çmimet e hoteleve e restoranteve luhaten rreth mesatares së BE.
Në Qipro dhe Maltë treguesi zbret në rreth 90% të mesatares europiane dhe në Greqi dhe Kroaci, luhatet në rreth 81-84%.
Portugalia është një nga vendet më të lira të Bashkimit Europian për të qëndruar në hotel dhe për të shkuar në restorante, me rreth 73% të mesatares europiane.
Për këtë arsye, për disa vite me radhë kryeqyteti i Portugalisë, Lisbona, u rendit si një nga destinacionet kryesore të Europës.
Më e lira në Europë është Turqia
Turqia është destinacioni i shumë shqiptarëve si gjatë verës ashtu dhe në periudha festash. Dhe jo më kot.
Akomodimi dhe ushqimi në Turqi është më i liri në Europë, me vetëm 42% të mesatares europiane.
Rajoni
Vendet e rajonit në përgjithësi janë ndër më të lirat në Europë, ku akomodimi dhe ushqimi kushton mesatarisht sa gjysma apo më pak e mesatares europiane.
Më të shtrenjtat në rajon janë Mali i Zi, me rreth 57% të mesatares Europian dhe Serbia dhe Bosnja me 55%.
Shqipëria dhe Maqedonia e Veriut janë jo vetëm më të lirat në rajon, por edhe ndër më të lirat në Europë, me 46.2% të mesatares europiane.
Sipas Eurostat, shpenzimet nominale për banor për hotele e restorante në vitin 2021 në Shqipëri ishin 185 euro.
Vitet e fundit vendi ynë është bërë një destinacion tërheqës për turistët nga e gjithë bota, që vijnë të shijojnë jo vetëm bukuritë natyrore, por edhe çmimet ende më të lira se në shumë shtete të tjera të Europës.
Për 11 mujorin, sipas INSTAT, vendin e vizituan një numër rekord prej 7.1 milionë të huajsh, duke tejkaluar periudhën para pandemisë.
LEXO EDHE: Rekord këtë vit/ 12 milionë vizitorë në Shqipëri
Shifrat për Kosovën mungojnë, por renditje të tjera tregojnë se niveli i çmimeve është pak më i lirë sesa Shqipëria.
