Taksitë dhe urbanët që ofrojnë shërbim brenda qyteteve do të përjashtohen nga detyrimi për të lëshuar dhe fiskalizuar fatura.
Udhëzimi më i fundit i Ministrisë së Financave i cili ka hyrë në fuqi sjell ndryshime në ligjin e “Për faturën dhe sistemin e monitorimit të qarkullimit”, duke përjashton nga detyrimi i lëshimit të faturave të gjithë “tatimpaguesit që ofrojnë shërbimin taksi të pajisur me taksimetër dhe ata që shesin bileta ose abone për transport pasagjerësh në sektorin e transportit publik urban brenda qytetit (autobusë) në përputhje me vendimin e njësive të vetëqeverisjes vendore, nëse fatura e taksimetrit, bileta ose aboneja u jepet pasagjerëve direkt nga drejtuesi i mjetit ose nga një person i autorizuar”.
Po ashtu udhëzimi sjell një ndryshim sa i takon regjistrimi i faturave në librin e shitjes dhe librin e blerjes duke krijuar lehtësi për disa kategori biznesesh në këtë drejtim.
Kështu, “faturat e fiskalizuara nga subjekte që ushtrojnë aktivitet në fushën e telekomunikacionit, sigurimeve, furnizimit të energjisë elektrike dhe ujit për konsumatorët finalë, si dhe faturat mujore të lidhura me kontrata afatgjata leasing dhe fatura të ngjashme me to, të cilat lëshohen në mënyrë të vazhdueshme dhe mbi bazën e një kontrate afatgjatë të lidhur paraprakisht nga palët, do të çmohen të fiskalizuara automatikisht dhe pavarësisht statusit të blerësit.
