Pas një rritje të ndjeshme të numrit të rasteve të reja me COVID-19, në vendin tonë po shihet një tendencë në rënie e të infektuarve të rinj.
Institucionet shtetërore konfirmuan zyrtarisht në datën 23 dhjetor, 2 rastet e para me variantin Omicron, që ndikoi në një rritje të shpejtë të të të prekurve, ndërsa që prej asaj date numri i të infektuarve pati një tendencë në rritje, duke kulmuar në datën 18 janar me 2832 raste të konfirmuar.
Por, pas kësaj date ka nisur tendenca në rënie, teksa në ditët e fundit, numri i të infektuarve ka arritur në nivelet e para konfirmimit të variantit Omicron. Kjo situatë ishte paralajmëruar nga epidemiologët në vend, të cilët parashikonin që me nisjen e muajit shkurt numri i infektimeve të reja do të binte ndjeshëm.
Ndërkaq, sipas të dhënave nga Ministria e Shëndetësisë dhe Mbrojtjes Sociale, deri në datën 17 shkurt në vendin tonë numërohen 6170 raste aktive, teksa Tirana kryeson listën me 2158 raste apo rreth 30% të tyre.
Për këtë arsye, ata kanë rekomanduar edhe një lehtësim të masave kufizuese, kryesisht në drejtim të aplikimit të orës policore.
Gjithashtu, ata kanë kërkuar reduktimin e periudhës së kthimit në punë, duke qenë se varianti Omicron karakterizohet nga shenja më të lehta dhe negativizimi ndodh më shpejt.
Megjithatë, prej disa javësh Komiteti Teknik i Ekspertëve nuk është mbledhur, duke bërë që asnjë prej rregullave në fuqi të mos ndryshojnë.
