Një aksident rrugor është regjistruar paraditen e sotme në aksin Levan–Tepelenë, në vendin e quajtur Varibop.
Sipas të dhënave paraprake, një automjet tip Volkswagen ka humbur kontrollin dhe ka dalë nga rruga, duke përfunduar në një kanal anësor.
Për pasojë, drejtuesi i mjetit ka mbetur i lënduar dhe është transportuar në Spitalin Rajonal të Fierit, ku po merr trajtim mjekësor. Burime paraprake bëjnë me dije se ai ndodhet jashtë rrezikut për jetën.
Policia po heton për të përcaktuar shkaqet e aksidentit.
Nga pikëpamja e sigurimeve, e drejta për dëmshpërblim varet nga rrethanat e aksidentit.
Nëse bëhet fjalë për një vetëaksident dhe drejtuesi është edhe shkaktari i ngjarjes, polica e detyrueshme TPL nuk mbulon dëmtimet e vetë drejtuesit, pasi ligji përjashton nga dëmshpërblimi drejtuesin e mjetit shkaktar të aksidentit.
Megjithatë, nëse në automjet ndodheshin pasagjerë të lënduar, ata mund të kërkojnë dëmshpërblim nga sigurimi TPL i mjetit për dëmet shëndetësore të pësuara.
