Shoqata e Siguruesve Britanikë (ABI) u bëri thirrje kompanive të teknologjisë, platformave sociale dhe operatorëve të telekomunikacionit të marrin më shumë përgjegjësi në luftën kundër mashtrimit, pas prezantimit nga qeveria britanike të një strategjie të re kombëtare kundër mashtrimit të mbështetur me mbi 250 milionë paund financim publik.
Drejtoresha e përgjithshme e ABI, Hannah Gurga, theksoi se mashtrimi mbetet “krimi më i madh në Angli dhe Uells”, duke prekur çdo vit miliona qytetarë, shpesh edhe ata më të pambrojturit.
Ajo përshendeti përpjekjet e qeverisë për bashkëpunim ndërmjet sektorëve të ndryshëm, por theksoi se përgjegjësia për parandalimin e mashtrimit nuk mund të mbetet vetëm mbi industrinë e sigurimeve.
Sipas saj, duke qenë se shumica e mashtrimeve fillojnë në internet, kompanitë e teknologjisë, rrjetet sociale dhe ofruesit e shërbimeve telefonike duhet të përmbushin angazhimet e tyre dhe të kontribuojnë më aktivisht në parandalimin dhe zbulimin e këtyre rasteve. Gurga përshëndeti gjithashtu krijimin e një kuadri më të fortë monitorimi që do të mbikëqyrë performancën e këtyre kompanive në luftën kundër mashtrimit.
Strategjia e re kundër mashtrimit për periudhën 2026–2029, e prezantuar nga ministri i shtetit në Ministrinë e Brendshme, Lord Hanson, bazohet në tre shtylla kryesore.
Së pari, synohet goditja e mjeteve dhe platformave që përdorin kriminelët për të kryer mashtrime.
Së dyti, strategjia parashikon rritjen e mbrojtjes së qytetarëve përmes policimit proaktiv dhe hetimeve më të forta.
Së treti, ajo përfshin përmirësimin e mbështetjes për viktimat dhe forcimin e zbatimit të ligjit.
Sipas të dhënave zyrtare, mashtrimi përbën tashmë 45% të të gjitha krimeve në Mbretërinë e Bashkuar, me rreth 4.15 milionë raste të regjistruara ndaj individëve gjatë vitit të fundit. Kostoja e përgjithshme e këtij fenomeni vlerësohet të arrijë në rreth 14 miliardë paund në vit.
Edhe industria e sigurimeve përballet me pasoja të mëdha nga ky fenomen.
Sipas të dhënave të ABI, pretendimet mashtruese të zbuluara në sigurimet e përgjithshme arritën një nivel rekord prej 1.16 miliardë paund në vitin 2024, një rritje prej 2% krahasuar me një vit më parë, me më shumë se 98 mijë raste të identifikuara.
Mashtrimet në sigurimin e automjeteve përbënin 53% të të gjitha rasteve të zbuluara, ndërsa mashtrimet në sigurimet e përgjegjësisë u rritën me 44%.
Ndërkohë, shumica e rasteve, rreth 73%, lidhen me mashtrime oportuniste, ku kërkesat e ligjshme për dëmshpërblim fryhen me qëllim për të përfituar më shumë para.
Strategjia e re ndërtohet mbi përpjekjet e mëparshme të qeverisë britanike.
Ajo pason Strategjinë kundër Mashtrimit të vitit 2023, e cila kishte si objektiv uljen me 10% të rasteve të mashtrimit krahasuar me nivelet e vitit 2019 dhe vendosi marrëveshje bashkëpunimi vullnetare me sektorë të ndryshëm.
Sipas Ministrisë së Brendshme, pas zbatimit të kësaj strategjie është regjistruar një ulje prej 13% e rasteve të mashtrimit.
Në kuadër të planit të ri do të krijohet edhe një Qendër e Re për Krimin Online, një partneritet mes sektorit publik dhe privat që do të bashkojë policinë, komunitetin e inteligjencës dhe industrinë për të luftuar mashtrimet digjitale.
Qeveria do të investojë 31 milionë paund për ngritjen dhe funksionimin e kësaj qendre.
Strategjia parashikon gjithashtu krijimin e një Karte për Viktimat e Mashtrimit, një rishikim të pavarur të legjislacionit ekzistues dhe mundësinë e vendosjes së sanksioneve civile në rastet kur rregullat nuk respektohen.
Ministri Lord Hanson deklaroi se qëllimi i qeverisë është që Mbretëria e Bashkuar të bëhet vendi më i vështirë në botë për mashtruesit, duke paralajmëruar se mund të nevojiten iniciativa dhe stimuj të rinj në rast se angazhimet vullnetare të sektorëve të ndryshëm nuk japin rezultatet e pritura.
Nga ana e saj, Gurga konfirmoi se industria e sigurimeve do të vazhdojë bashkëpunimin me qeverinë për zbatimin e Kartës së Sektorit të Sigurimeve kundër Mashtrimit, një marrëveshje vullnetare e shpallur në tetor 2024. Kjo marrëveshje synon të adresojë boshllëqet në tregun e sigurimeve, të përmirësojë shkëmbimin e të dhënave dhe të rrisë mbështetjen për viktimat e mashtrimit.
Karta është nënshkruar nga ABI së bashku me organizata të rëndësishme të industrisë si Lloyd’s of London dhe BIBA, dhe mbikëqyret nga Task Forca e Përbashkët kundër Mashtrimit.
Gurga theksoi se kompanitë e sigurimeve tashmë investojnë shuma të mëdha në luftën kundër mashtrimit dhe e konsiderojnë këtë kërcënim shumë serioz.
Ndërkohë, qeveria britanike konfirmoi se vendi do të marrë pjesë në Samitin e Dytë Global kundër Mashtrimit në Vjenë, ku pritet të marrin pjesë më shumë se 30 shtete për të diskutuar bashkëpunimin ndërkombëtar në luftën kundër këtij fenomeni.
