Një nga pyetjet që portali i specializuar për lajmet vendase dhe ndërkombëtare të industrisë së sigurimeve dhe risigurimeve, Sigurime.Online merr më shpesh nga lexuesit është kjo: A përfitoj kompensim dëmi nëse mjeti që më ka dëmtuar nuk është i siguruar me TPL? Përgjigjja është e qartë dhe e thjeshtë: Po, ligji ta njeh këtë të drejtë.
Nëse je këmbësor apo drejtues mjeti dhe një mjet i pasiguruar apo i paidentifikuar të shkakton dëm, material apo shëndetësor, mos u shqetëso! Ligji ta njeh të drejtën e patjetërsueshme të kompensimit dhe për këtë nuk të duhet as avokat, as ndërmjetës.
Çfarë parashikon ligji?
Sipas Ligji nr. 32/2021 “Për sigurimin e detyrueshëm në transportin rrugor”, ekzistojnë mekanizma mbrojtës për të dëmtuarit, edhe kur shkaktari i aksidentit nuk ka siguracion TPL.
Rasti 1: I dëmtuari është këmbësor
Nëse një këmbësor dëmtohet nga një mjet motorik, pavarësisht nëse ai mjet ka apo jo siguracion TPL, neni 41 i ligjit i jep të drejtën të kërkojë dëmshpërblim duke iu drejtuar Fondit të Kompensimit pranë Byroja e Siguruesve Shqiptare.
Ky fond është krijuar pikërisht për të mbrojtur viktimat në raste kur:
-
mjeti shkaktar është i pasiguruar,
-
mjeti është i paidentifikuar,
-
apo kur ekzistojnë rrethana të tjera të parashikuara nga ligji.
Rasti 2: I dëmtuari është drejtues i një mjeti tjetër
Nëse i dëmtuari është drejtues i një automjeti tjetër dhe shkaktari i aksidentit nuk ka TPL, ai nuk mbetet pa mbrojtje.
Në këtë rast, i dëmtuari mund t’i drejtohet drejtpërdrejt shoqërisë së tij të sigurimit, e cila ushtron funksionin e entit të kompensimit të drejtpërdrejtë. Kjo shoqëri likuidon dëmin ndaj klientit të saj dhe më pas ka të drejtën e padisë së regresit ndaj shkaktarit për të rikuperuar vlerën e paguar të dëmit.
Çfarë do të thotë kjo në praktikë?
Edhe nëse përballesh me një mjet të pasiguruar: nuk humbet të drejtën e dëmshpërblimit sepse ligji garanton mekanizma mbrojtës dhe përgjegjësia financiare përfundimisht i mbetet shkaktarit të aksidentit, të cilit kompania e sigurimit i drejtohet me padi regresi.
Sigurimi i detyrueshëm TPL është një detyrim ligjor, por mungesa e tij nga pala shkaktare nuk cenon të drejtën e viktimës për kompensim.
