Pas votimit në Kuvend ministrat e rinj në kabinetin qeveritar të kryeministrit Rama janë betuar sot në Presidencë. Para presidentit Begaj dhe mbi Kushtetutë janë betuar ministri i ri i Brendshëm Ervin Hoxha, ministri i ri i Financave Petrit Malaj dhe ministri i ri Mbrojtjes, Pirro Vengu.
Emrat e rinj në kabinetin qeveritar erdhën pas ndryshimeve dhe lëvizjeve në qeveri që kryeministri Edi Rama bëri në Kongresin e Partisë Socialiste.
Rama i shpjegoi lëvizjet dhe ndryshimet në qeveri duke filluar me Taulant Ballën, të cilin e zhvendosi nga posti i ministrit të Brendshëm për t’i dhënë detyrën e ministrit të Shtetit për Marrëdhëniet me Parlamentin.
Ervin Mete i la vendin Petrit Malajt për të marrë drejtimin e Ministrisë së Financave, ndërsa Niko Peleshi i la vendin Pirro Vengu në krye të Ministrisë së Mbrojtjes.
Ish-ministri Peleshi do të drejtojë grupin parlamentar të Partisë Socialiste teksa vitin e ardhshëm Shqipëria shkon drejt zgjedhjeve të përgjithshme parlamentare.
Po kush janë emrat e rinj në qeveri?
Ervin Hoxha-Ministër i Brendshëm
Ervin Hoxha i cili do të mbajë postin e ministrit të Brendshëm më parë ka mbajtur detyrën e drejtorit të Përgjithshëm të Shërbimit të Provës. Ai u lirua nga kjo detyrë në nëntorin e vitit të kaluar ndërsa tani pritet të marrë një nga postet më të rëndësishme. Hoxha ka kryer Akademinë e Lartë të Sigurisë (Offizier Schule des Herres) në Dresden të Gjermanisë. Në vitin 2006 përfundoi ciklin universitar në Fakultetin e Shkencave Sociale në Universitetin e Tiranës. Ervin Hoxha ka përfunduar arsimin pasuniversitar në Shkollën e Lartë të Policisë Gjermane (Deutsche Hochschule der Polizei), duke fituar titullin M.A në Administrim Publik dhe Menaxhim Policor).
Për më shumë se 20 vite ka shërbyer në funksione të ndryshme nga niveli ekzekutues deri në nivelet më të larta te drejtimit në institucione qendrore dhe ligjzbatuese të shtetit shqiptar si: Ministria e Mbrojtjes, Ministria e Brendshme, Policia e Shtetit, Ministria e Financave, Ministria e Drejtësisë.
Ka mbajtur detyra në nivelin drejtues si: Drejtor i Marrëdhënieve Ndërkombëtare, Shef i Njësisë Kombëtare Europol, Shef i Zyrës Qendrore Kombëtare Interpol, Drejtor i Policisë Rrugore, Drejtor i Drejtorisë së Mbrojtjes së Dëshmitarëve dhe Bashkëpunëtorëve të Drejtësisë, Drejtor i Hetimit Tatimor dhe Pastrimit të Parave, Zv. Drejtor i Përgjithshëm i Institutit të Sigurimeve Shoqërore, si edhe Drejtor Kabineti dhe Këshilltar i disa funksionarëve të lartë të shtetit shqiptar. Ervin Hoxha zotëron në nivel të avancuar gjuhën turke, gjermane dhe atë angleze.
Petrit Malaj-Ministër i Financave
Petrit Malaj është emri i ri i propozuar nga kryeministri Edi Rama për të drejtuar Ministrinë e Financave duke zëvendësuar në këtë post, Ervin Meten. Petrit Malaj është aktualisht drejtori ekzekutiv i Agjencisë së Burimeve Natyrore (AKBN). Malaj u zgjodh në këtë detyrë në janar të vitit 2024, ndërkohë që sot kryeministri Rama e propozoi atë për të drejtuar dikasterin e Financave në vend të Ervin Metes.
Referuar jetëshkrimit të tij, Petrit Malaj është diplomuar në Fakultetin Ekonomik të Universitetit të Tiranës, ka vijuar studimet për Master në “Business Administration” në Universitetin Wisconsin- La Crosse në SHBA , është kualifikuar për “Banking and Finance” në Universitetin Georgetown, SHBA dhe më pas ka ndjekur një program kualifikimi për Drejtimin e Tregut të Kapitaleve, të Ministrisë Federale për Bashkëpunim dhe Zhvillim të Gjermanisë. Malaj ka një përvojë të pasur në sistemin bankar në Shqipëri dhe më pas është angazhuar si Drejtor Ekzekutiv në kompaninë “BDO Albania”, pjesë e BDO International, grupi i pestë më i madh në botë në fushën e Konsulencës Financiare, Auditit dhe Taksave.
Pirro Vengu-Ministër i Mbrojtjes
Pirro Vengu i cili do të marrë postin e ministrit të Mbrojtjes në vend të Niko Peleshit ka mbajtur deri më sot postin e drejtorit të Autoritetit Portual Durrës, ndërsa më herët ka mbajtur postin e drejtorit Antikorrupsionit në Kryeministri.
Gjithashtu, Vengu ka qenë edhe drejtor kabineti në Ministrinë e Jashtme të ish-ministrit për Evropën dhe Punët e Jashtme Ditmir Bushati në qeverinë “Rama 1”.
Në vitin 2017 ai u emërua drejtor i antikorrupsionit në Kryeministri. Në vitin 2015, teksa ishte në detyrë në ministrinë që drejtohej nga Ditmir Bushati, Vengut i erdhi një fletëthirrje nga Greqia, me arsyetimin se nuk kishte kryer detyrimin ushtarak në shtetin grek, detyrim që vinte për shkak të mbajtjes së pasaportës greke.
