Një nga qytetet më të mëdha në veriun e largët të Kanadasë është duke u evakuuar, mes paralajmërimeve se mund të përfshihet nga flakët në fundjavë.
20,000 banorëve të Yellowknife, kryeqyteti i Territoreve Veriperëndimore, u është dhënë kohë deri në mesditën e së premtes për t’u larguar.
Që nga e mërkura vonë, flakët ishin 17 km larg nga qyteti, ndërsa një tjetër zjarr po kërcënon komunitetin e Lumit Hay.
Territoret Veriperëndimore shpallën një gjendje të jashtëzakonshme të martën vonë, pasi luftuan më shumë se 200 zjarre. Hane Thompson, ministri i mjedisit i rajonit, tha në një konferencë për shtyp të mërkurën se zjarret “kishin marrë një tjetër drejtim për keq” dhe se tani përfaqësonin një “kërcënim real” për Yellowknife.
“Dua të theksoj se qyteti nuk është në rrezik të menjëhershëm, por pa shi, është e mundur që zjarri të arrijë në periferi të qytetit deri në fundjavë. Ju e vendosni veten dhe të tjerët në rrezik nëse vendosni të qëndroni”, tha ai.
Kryetari i bashkisë së Lumit Hay, Kandis Jameson, vlerësoi se rreth 500 njerëz ishin ende në komunitetin me 3,500 persona që nga e marta, pavarësisht një njoftimi evakuimi të lëshuar për qytetin.
Zjarri lëvizi 30 km në pak orë për shkak të erërave të forta në fillim të kësaj jave, duke mbyllur dy autostradat e vetme jashtë qytetit.
Rruga nga Lumi Hay është “e pabesë”, tha kryebashkiaku, dhe furnizimet me ushqime dhe benzinë po pakësohen në qytet. Shërbimet e telefonit dhe të internetit kanë qenë gjithashtu të ndërprera në rajonin e largët.
Ushtria kanadeze ka koordinuar operacionet e transportit ajror nga disa komunitete në Rajonin Jugor të Territoreve Veriperëndimore që janë kërcënuar nga zjarret në ditët e fundit.
Është përpjekja më e madhe e evakuimit të transportit ajror në historinë e territorit. Shumica e të evakuuarve janë sjellë në jug në provincën fqinje të Albertës, pa asnjë tregues se kur do të mund të kthehen në shtëpi.
Kanadaja po kalon sezonin e saj më të keq të zjarreve, me afro 1,100 zjarre aktive që digjen në të gjithë vendin që nga e mërkura. Ekspertët kanë përmendur si arsye një pranverë më të ngrohtë dhe më të thatë se normalja.
Shkencëtarët thonë se ndryshimi i klimës rrit rrezikun e motit të nxehtë dhe të thatë që ka të ngjarë të nxisë zjarret.
LEXO EDHE: Mundi i një jete shkrumbohet për pak çaste/ Zjarri djeg vilën tre-katëshe në Kukës
