Prej dy ditësh, pjesa më e madhe e rajonit të Emilia Romagna-s në Itali është përfshirë nga përmbytjet dhe rrëshqitjet e dheut, të cilat i kanë marrë jetën të paktën 9 personave.
Edhe pse reshjet kanë pushuar momentalisht, mediat italiane raportojnë se zonat e përmbytura janë zgjeruar gjatë natës në Ravena, një nga më të goditurat nga moti i keq.
“TgCom” shkruan se evakuimet kanë vijuar edhe gjatë natës në zonën e Castel Bolognese e në Ravena, ku ka pasur probleme edhe me ujin e pijshëm.
Qendra historike e Lugos, në zonën e Ravenës, është përmbytur. Aty uji ka arritur një nivel më shumë se një metër.
Mbi 13 mijë persona janë evakuuar, ndërsa 50 mijë kanë mbetur pa energji elektrike. Shkollat mbeten të mbyllura në shumicën e bashkive të prekura, veçanërisht në zonat e Bolonjës dhe Ravenës.
Bonaccini: “Dëme miliarda euro, do të jetë një punë e madhe”
Përmbytja në Emilia-Romagna kanë shaktuar dëme të paktën “në disa miliardë euro”. Kështu shprehet presidenti i Rajonit, Stefano Bonaccini.
“Do të jenë dëme disa miliardë euro. 30 milionët e akorduara nga qeveria janë të mirëseardhura dhe e falenderoj për vendosjen e menjëhershme në dispozicion. Por këtu flasim për një miliardë euro dëme.
Dëmi ishte edhe më i madh se sa pritej. Fatmirësisht ne dhamë alarmin e kuq 24 orë më herët, përndryshe do të ishte një tragjedi edhe më dramatike.
Për të rikuperuar do të duhet një punë e madhe. Ka qindra rrugë për të riparuar, ka nevojë për të kompensuar bizneset dhe qytetarët e prekur dhe më pas të fillojë përsëri aktiviteti”.
