Deputetja Jorida Tabaku reagoi të shtunën ndaj rritjes së pensioneve të njoftuar nga Qeveria që pritet të nisë nga tetori.
Sipas saj, kjo rritje është një ofendim për 750 mijë pensionistët, të cilët sipas saj, përballen çdo ditë me çmime që janë rritur deri në 30% për ushqimet dhe shpenzimet bazë.
“Çfarë mund të blejë një pensionist me 25 lekë shtesë në ditë, kur çmimet e jetesës janë në rritje të vazhdueshme? Kjo është një padrejtësi e madhe ndaj pensionistëve tanë, që janë ndër shtresat më të nën përkrahura të shoqërisë”.
Ajo e cilësoi këtë situatë si pasqyrë e keq menaxhimit të buxhetit nga qeveria, që mbështet pakicën në kurriz të shumicës së popullit.
Tabaku paralajmëroi se familjet shqiptare po varen gjithnjë e më shumë nga të ardhurat e emigrantëve, pasi rritja e çmimeve dhe mungesa e mbështetjes shtetërore po i shtyn të rinjtë të largohen në masë nga vendi.
Ajo nënvizoi faktin se 26% e familjeve shqiptare mbijetojnë falë të ardhurave nga jashtë, ndërsa qeveria vijon të mos përfillë nevojat e tyre reale.
“Ne duhet të ndryshojmë këtë situatë dhe të mbështesim shtresat në nevojë, përfshirë pensionistët, të cilët kanë kontribuar për këtë vend dhe meritojnë më shumë se një rritje simbolike që nuk i mbulon as nevojat minimale,” përfundoi Tabaku.
LEXO EDHE: “U rritën me vetëm 25 lekë në ditë”/ A mund të pleqërohet me dinjitet me pensionet që kemi?
