Të dhënat tregojnë se struktura e portofolit të tregut ka pësuar ndryshime të lehta, me një balancim më të madh midis segmenteve të sigurimeve të jetës dhe atyre jo-jetë. Edhe pse sigurimet jo-jetë vazhdojnë të dominojnë tregun, pesha e tyre në portofolin total është ulur me rreth 3 pikë përqindjeje.
Një nga zhvillimet më të rëndësishme gjatë kësaj periudhe ishte forcimi i mëtejshëm i sigurimeve motorike, të cilat fituan rreth 5 pikë përqindjeje në peshën e tyre në treg. Prime bruto të shkruara për këtë segment u rritën me 9.65%, duke arritur në 29.93 milionë euro, çka konfirmon kërkesën në rritje për produktet e lidhura me automjetet.
Po ashtu, segmenti i sigurimeve të jetës vijoi trendin pozitiv, me prime bruto të shkruara në vlerën 13.83 milionë euro, ose 12.75% më shumë se një vit më parë. Kjo performancë tregon interesin në rritje të qytetarëve për mbrojtjen financiare afatgjatë dhe produktet e kursimit.
Nga ana tjetër, sigurimet e pronës shfaqën një ecuri më të dobët. Pas rritjes së fortë të regjistruar në tremujorin e parë të vitit 2025, primet për sigurimin nga zjarri ranë me më shumë se gjysmën, duke zbritur në 5.05 milionë euro.
Pavarësisht tkurrjes së përgjithshme të tregut, rritja e sigurimeve të jetës dhe e atyre motorike tregon se sektori i sigurimeve në Maqedoninë e Veriut po vazhdon të transformohet, duke reflektuar nevojat në ndryshim të konsumatorëve dhe orientimin drejt produkteve me vlerë më të lartë për mbrojtjen personale dhe financiare.
