Tregu i sigurimeve të Jo-Jetës në Shqipëri ka vijuar trendin rritës gjatë nëntëmujorit të parë të vitit 2025, duke shënuar një rritje prej 10.10% krahasuar me të njëjtën periudhë të një viti më parë.
Sipas të dhënave të Autoritetit të Mbikëqyrjes Financiare (AMF), vlera e përgjithshme e primeve të shkruara bruto në këtë segment ka arritur në 18.5 miliardë lekë.
Peshën më të madhe në treg e zënë sigurimet e detyrueshme motorike, të cilat përbëjnë 67.4% të totalit, me një vlerë prej 12.47 miliardë lekësh të paguara nga qytetarët shqiptarë.
Në vend të dytë renditet sigurimi nga zjarri dhe forcat e tjera të natyrës, që përfaqëson 10.24% të tregut, me një vlerë prej 1.89 miliardë lekësh.
Më tej vijnë sigurimet e mjeteve të tjera tokësore, me 8.17% të tregut dhe një total prej 1.51 miliardë lekësh.
Segmentet e tjera mbeten me peshë më të ulët, ku sigurimi i përgjegjësive civile të përgjithshme zë 3.93%, sigurimi i sëmundjeve 3.59%, sigurimi i garancive 1.62%, ndërsa sigurimet e lidhura me transportin detar dhe ajror përbëjnë pjesën më të vogël të tregut: sigurimi i anijeve (0.26%), përgjegjësia civile e anijeve (0.25%), mallrat në transport (0.24%) dhe përgjegjësia civile e avionëve (0.11%).
Të dhënat tregojnë se sigurimet e Jo-Jetës mbeten një shtyllë kryesore e tregut të sigurimeve në vend, e udhëhequr fuqishëm nga sigurimet motorike, ndërsa interesimi për sigurimet e pronës dhe shëndetit po rritet gradualisht, por ende në nivele të krahasuara me zërat e tjerë.
