“Babain ma aksidentuan në rrugë, por për fat të keq mjeti që e goditi ishte i pasiguruar dhe nuk përfituam asnjë dëmshpërblim si familje.”
Kjo është një histori që reflekton një problem të shpeshtë, por edhe një mungesë informimi për të drejtat që kanë familjarët e viktimave në aksidente rrugore.
Sipas Nenit 41 të Ligjit Nr. 32/2021 “Për sigurimin e detyrueshëm në sektorin e transportit”, ekziston një Fond Kompensimi i administruar nga Byroja Shqiptare e Sigurimit.
Ky fond ka për qëllim pagesën e dëmeve ndaj personit dhe pronës, edhe kur mjeti shkaktar është i pasiguruar ose i paidentifikuar. Pra, familjet nuk duhet të humbasin shpresën për dëmshpërblim vetëm sepse shoferi shkaktar nuk kishte sigurim.
Edhe nëse mjeti shkaktar nuk ka siguracionin, ose është jashtë afatit të mbulimit, viktima e një aksidenti rrugor përfiton dëmshpërblim. Kjo është një e drejtë e sanksionuar me ligj.
Ky është një informacion i rëndësishëm, pasi siguron që familjarët e viktimave kanë të drejtë të kërkojnë dhe të përfitojnë dëmshpërblimin ligjor nga fondi, pa pasur nevojë për ndërmjetës apo avokatë.
Kërkesa për dëmshpërblim mund të bëhet drejtpërdrejt nga familjarët, duke lehtësuar kështu procesin dhe duke garantuar mbështetje financiare në një moment të vështirë.
Informimi i duhur për këto të drejta është thelbësor, që asnjë familje të mos mbetet pa ndihmë për shkak të mungesës së njohurive ligjore.
Në këtë mënyrë, ligji synon të mbrojë dhe kompensojë familjet e dëmtuara, pavarësisht nga situata e sigurimit të mjeteve shkaktare.
