Insurance Journal solli sot historinë e veçantë të Mark Xhilmartin, një golfist amerikan që ktheu pasionin e tij për sportin në një biznes unik sigurimesh. Pasi nuk arriti të bëhej profesionist, në vitin 1991 ai themeloi kompaninë Hole In One International, e cila ofron sigurim për turnet e golfit me goditjen e famshme hole-in-one. Falë mbështetjes së një shoku kolegji, Kirk Triplett, kompania u rrit shpejt dhe më vonë u zgjerua edhe në sporte të tjera.
Në fillim të viteve 2000, Xhilmartin krijoi Odds On Promotions, duke mbuluar konkurse me bazë aftësie si gjuajtje nga gjysma e fushës në basketboll, gjuajtje field goal në futboll amerikan apo edhe gara peshkimi. Kompania ofron gjithashtu sigurim për lotari dhe lojëra promovuese. Pas pandemisë, ai shtoi portofolin me blerjen e Hole in One USA, duke u bërë lider në sigurimet për shpërblime të mëdha.
Sipas tij, në këtë fushë ka tre lloje kryesore rreziku: matematikor, me bazë aftësie dhe me bazë probabiliteti. Megjithatë, fokusi kryesor mbetet tek garat e bazuara në aftësi. Me mbi 30 vjet përvojë, Xhilmartin thekson se një goditje e vetme mund të kushtojë nga mijëra deri në miliona dollarë, por që në fund rreziku shpërndahet dhe bilanci gjeneron fitim.
Procesi i dëmeve është i rreptë: kërkohen video dhe vëzhgues të pavarur për të garantuar korrektësinë. Teknologjia dhe rrjetet sociale e lehtësojnë dhe e vështirësojnë njëkohësisht punën, duke sjellë më shumë prova, por edhe më shumë presion nga publiku. “Është pjesë e lojës,” përfundon Xhilmartin, duke pranuar se sigurimi i shpërblimeve është një fushë sa e ndërlikuar aq edhe emocionuese.
