Një aksident ka ndodhur mesditën e sotme në aksin rrugor Tepelenë-Gjirokastër, në Mashkullorë, me pasojë lëndimin e dy personave.
Mësohet se drejtuesi i mjetit K.K., 28 vjeç ka humbur kontrollin mbi drejtimin dhe mjeti ka dalë nga rruga. Për pasojë është dëmtuar drejtuesi i automjetit dhe pasagjerja, A. Xh., rreth 22 vjeçe.
Të dy u transportuan drejt Spitalit Rajonal Gjirokastër, ndërsa ende nuk ka informacione për gjendjen e tyre shëndetësore.
Në Shqipëri numri i aksidenteve rrugore vijon të jetë problem.
Nga janari deri në fund të shtatorit të këtij viti janë shënuar në rrugët e vendit 884 aksidente rrugore, me 1257 të vdekur dhe të plagosur.
Numrin më të madh të aksidenteve vijon ta mbajë Tirana ku në 9 muaj janë shënuar 400 aksidente, e ndjekur nga Lezha me 123 aksidente dhe Gjirokastra me 58 të tilla.
Ndërsa numrin më të ulët për periudhën janar-shtator e ka qarku Dibër me 5 aksidente rrugore.
Në një raport të mëparshëm, Banka Botërore e rendiste Shqipërinë në vendin e tretë në Europë për normën më të lartë të vdekjeve në rrugë, përkatësisht 94 vdekje për 1 milion banorë.
