Pjesa më e madhe e Europës Jugore vijon të përjetojë të nxehtë ekstrem.
Për shkak të temperaturave të “ferrit”, për këtë javë janë lëshuar paralajmërime serioze se rekorde mund të thyhen në Itali, Greqi, Turqi dhe në vendet e Ballkanit.
Kjo ka bërë që vatrat e zjarrit, jo vetëm që të jenë të shumta, por tepër të vështira për t’i kontrolluar. Në Turqi paraqitet situatë emergjente në disa zona të rajonit Hatay.
Autoritetet atje njoftuan se për luftimin e zjarreve në Belen, Gülnar dhe Çanakkale janë angazhuar 7 avionë, 12 helikopterë, me dhjetëra pajisje të ndryshme, si dhe 320 zjarrfikës.
Terreni i pjerrët, thatësira e madhe dhe era e fortë po vështirësojnë tej mase punën për fikjen e flakëve. Edhe në Greqi raportohet për situatë të vështirë. Të paktën 46 vatra zjarri në pyje kanë rënë në 24 orët e fundit për shkak të valës së të nxehtit dhe erërave të forta.
Zjarrfikës të shumtë janë angazhuar, ndërsa frika më e madhe është për ndonjë vatër që mund të bjerë në rajonin e Atikës, ku përfshihet dhe kryeqyteti i Athinës.
Flakët nuk po shuhen as në Ishujt Kanarie të Spanjës. Më shumë se 4 mijë persona janë evakuuar, teksa punohet për vendosjen nën kontroll të zjarreve. Italia vlerësohet të jetë epiqendra e “ferrit” veror në këtë valë të nxehti, me temperatura që mund të arrijnë në 47 gradë celsius këtë javë në Sardenja.
Rekordi në Europë është 48.8 gradë celsius, i shënuar në Siçili në gusht të vitit 2021. Autoritetet italiane kanë lëshuar alarmin e kuq për të paktën 16 qytete.
Kushtet e motit ekstrem që vijnë nga ngrohja klimatike po bëhen normaliteti i ri, paralajmëron Organizata Botërore e Meteorologjisë.
LEXO EDHE: Qëndroni të freskët edhe në verë/ Sigurimi i Shtëpisë, sipas nevojave tuaja dhe 10% më lirë
