Përmbytjet që shkaktuan dëme të mëdha në Itali, duke lënë pas edhe 14 viktima, janë një tjetër shembull i motit ekstrem si pasojë e ndryshimeve klimatike.
Shirat e rrëmbyeshëm të kësaj jave ishin katastrofikë, me dëme materiale që kaluan 3 miliardë euro.
Rajoni i Emilia Romagna ishte veçanërisht i prekshëm, për shkak të pozicionit gjeografik midis maleve Apenine dhe Detit Adriatik.
“Këto dukuri kanë qenë të vazhdueshme, por janë karakterizuar si të rralla”, tha kreu i mbrojtjes civile në rajon, Fabrizio Curzio.
Autoritetet njoftuan se 43 komunitete u prekën nga përmbytjet dhe rrëshqitjet e dheut ndërsa më shumë se 500 rrugë u mbyllën.
Ministri i Mbrojtjes Civile Nello Musumeci tha se “normaliteti i ri i ndryshimeve klimatike në Mesdhe do të thotë që italianët duhet të përshtatin dhe riprojektojnë politikën e tyre për përmbytjet”.
Ministri përmendi Venecian si shembull për t’u ndjekur, me ndërtimin e projektit ambicioz të digës kundër përmbytjeve MOSE, i cili lejon mbrojtjen e qytetit historik nga fenomeni i përmbytjeve ekstreme, i njohur si “acqua alta”.
“Nuk mund të pretendojmë se asgjë nuk po ndodh. Gjithçka duhet të ndryshojë: planifikimi, infrastruktura hidraulike dhe aftësitë e pompimit të ujit, si dhe e gjithë filozofia e këtyre projekteve”, tha Musumechi.
“Çelësi për të menaxhuar efektet e ndryshimeve klimatike është parandalimi”, tha ministri italian.
LEXO EDHE: Parashikime jo të mira për verën/ E keni siguruar shëndetin, shtëpinë, biznesin apo automjetin?
