Këshilli Mbikëqyrës i Bankës së Shqipërisë miratoi në muajin dhjetor disa ndryshime në rregulloren “Për administrimin e rrezikut në veprimtarinë e subjekteve financiare jobanka”.
Ndryshimet saktësojnë përfundimisht diferencimin mes institucioneve financiare të kredidhënies dhe atyre të parasë elektronike dhe pagesave, për të cilat Banka e Shqipërisë po ndërton një kuadër rregullator të veçantë, në mbështetje të ligjit të ri “Për shërbimet e pagesave”.
Rregullorja e re “Për administrimin e rrezikut në veprimtarinë e subjekteve financiare jobanka” parashikon disa ndryshime në përkufizimin e kapitalit të institucionit financiar dhe në mënyrën e llogaritjes së tij.
Në rregulloren e re, përkufizimi i kapitalit do të zëvendësohet me termin e kapitalit rregullator, si në rastin e bankave tregtare.
Në listën e elementeve të bilancit që njihen si pjesë e kapitalit llogaritur janë shtuar si zë negativ pjesëmarrjet në kapitalin e subjekteve të tjera. E thënë ndryshe, pjesëmarrjet në kapitalin e subjekteve të tjera duhet të zbriten nga kapitali rregullator i subjekteve financiare jobanka dhe institucioneve financiare të mikrokredisë.
Ndryshim tjetër i rëndësishëm në rregullore do të jetë shkalla e njohjes së borxhit të varur si pjesë e kapitalit rregullator.
Me rregulloren e mëparshme, borxhi i varur mund të përbëjë deri në 50% të kapitalit të subjekteve financiare jo banka, me përmbushjen e disa kushteve të caktuara. Me rregulloren e re, borxhi i varur nuk mund të përbëjë deri në 33.3% të kapitalit rregullator të njohur nga autoriteti mbikëqyrës.
Ky ndryshim do të hyjë në fuqi duke filluar nga data 1 janar 2024, për tu dhënë kohë institucioneve financiare të rregullojnë peshën e borxhit në varur në kapital, në përputhje me kërkesat e reja. Me rregulloren e re, njohja e borxhit të varur si pjesë e kapitalit rregullator do të ulet në të njëjtin nivel me bankat tregtare. Një masë e tillë do të kërkojë që institucionet financiare jobanka të mbështeten më shumë në kapitalet e veta dhe më pak në borxhin e varur.
Edhe institucionet financiare jo banka kanë disa kërkesa minimale për mjaftueshmërinë e kapitalit, por parametrat minimalë të kërkuara llogariten në një formë pak më të thjeshtuar krahasuar me bankat tregtare.
Për institucionet financiare jobanka, raporti i kapitalit me totalin e aktiveve, nuk duhet të jetë më pak se 5% në vitin e parë të veprimtarisë, 8% në vitin e dytë dhe 10% në vazhdim. Gjithashtu, raporti i kapitalit me totalin e aktiveve të qëndrueshme të trupëzuara dhe të patrupëzuara, nuk duhet të jetë më pak se 100%. Edhe raporti i kapitalit me totalin e kredive me probleme (neto) nuk duhet të jetë më pak se 100%.
Aktualisht, në Shqipëri janë të licencuara 38 institucione financiare jo banka, nga të cilat 23 zhvillojnë aktivitet të lidhur me forma të ndryshme të kredidhënies ose mikrokredisë. /Monitor
LEXO EDHE: Kush do ta paguajë kredinë e shtëpisë në rast fatkeqësie nëse nuk je i siguruar?
