Në Shqipëri, banesat e zakonshme të banuara kanë një histori të gjatë dhe të larmishme, duke reflektuar zhvillimet urbane dhe demografike të vendit.
Të dhënat e fundit tregojnë se një pjesë e madhe e këtyre banesave janë ndërtuar para vitit 2000, me një përqindje të konsiderueshme të ndërtuara edhe para vitit 1919.
“Scan Intel”, nisur nga të dhënat e Censit të vitit 2023, ka marrë në analizë të gjitha qarqet e Shqipërisë për të parë se cili ka banesat me të vjetra dhe sa peshë zënë banesat e ndërtuara para viteve 2000 ndaj totalit.
Nisur nga analiza e të dhënave, Gjirokastra ka përqindjen më të lartë të banesave të ndërtuara para viteve 2000, duke ruajtur kështu karakterin e saj të veçantë historik dhe arkitekturor. Banesat e ndërtuara në këtë qark para kësaj periudhe zenë një peshë prej 83% ndaj totalit.
Në përgjithësi, qarqet si Dibra, Korça, Berati, Kukësi dhe Shkodra kanë një përqindje të lartë të banesave të ndërtuara para vitit 2000, duke reflektuar zhvillimin urban të hershëm dhe rëndësinë historike të këtyre rajoneve.
Pesha që kanë banesat 25 vjeçare dhe më shumë në këto qarqe varion nga 82% për Dibrën, deri në 70% për Shkodrën.
Qarqet më të urbanizuara si Tirana dhe Durrësi kanë peshën më të ulët të banesave që janë ndërtuar para vitit 2000, me 51% dhe 56.8% përkatësisht.
Rreth 32% të totalit të banesave në Tiranë janë ndërtuar rreth viteve 2001-2010, ose e shprehur në shifër absolute numri arrin në rreth 76 mijë.
LEXO EDHE: Vendosen çmimet e reja të banesave në treg/ Cilat bashki kanë rritjen më të lartë?
Ndër të tjera, “Scan Intel” ka analizuar peshën e banesave të ndërtuara para vitit 1919.
Qarqe si Shkodra, Gjirokastra dhe Kukësi kryesojnë sa i përket këtij treguesi, me 4.2%, 3.7% dhe 3.5% të banesave të ndërtuara para vitit 1919-të. Ndërkohë, Fieri dhe Berati kanë peshën më të ulët me një vlerë prej 1.3% dhe 2%.
LEXO EDHE: Pse është i rëndësishëm Sigurimi i Shtëpisë
