Një zjarr ka shpërthyer ditën e sotme në nënstacionin elektrik të Draçinit në Shkodër, duke shkaktuar ndërprerje të energjisë elektrike në disa zona të qytetit.
Bëhet me dije se arsyet e shpërthimit të zjarrit ende mbeten të paqarta, por dyshohet se mund të jetë shkaktuar nga një defekt në pajisjet e nënstacionit elektrik.
Zjarri ka përfshirë edhe dy nënstacione të tjera elektrike, duke përkeqësuar situatën.
Ndërkohë disa familjarë kanë pësuar një dëm ekonomik prej mbi 10 milion lekë të vjetër, për shkak se zjarri nga nënstacioni përfshiu disa objekte në oborret e tyre.
LEXO EDHE: Çfarë është Sigurimi i Përgjegjësive Civile dhe çfarë mbulon?
Në banesë një e moshuar tregon se ndodhej bashkë me një fëmijë të vogël dhe është traumatizuar duke patur frikë se vajrat e transformatorëve mund të shpërthenin. Familjarët kërkojnë që të dëmshpërblehen nga OSHEE sepse dëmi i shkaktuar është i madh.
Drejtori i zjarrëfikëses në Shkodër Agim Ponari shprehet se kanë qenë 5 vatra zjarri njëkohësisht. Fillimisht janë njoftuar për shpërthimin e një kabine elektrike në Kiras dhe më pas edhe 3 kabina të tjera elektrike të vogla kanë shpërthyer si shkak i ngarkesës elektrike.
Në fund ka shpërthyer edhe nënstacioni elektrik i Draçinit. Drejtori Ponari thotë se zjarrëfikëset sapo kanë marrë njoftimet kanë shkuar menjëherë në të gjitha vatrat e zjarrit, ku kanë marrë njoftim duke shuar flakët.
