Kryeqyteti turk Ankara u godit orët e fundit nga stuhi të mëdha shiu që krijuan rrjedha të fuqishme ujërash që morën me vete edhe automjete, por fatmirësisht pa shkaktuar viktima apo të lënduar.
Rrëshqitje të mëdha toke shkaktuan reshjet e dendura edhe në qytezën italiane Lalio, buzë liqenit të Comos ku orët e fundit ka rënë e gjithë sasia e shiut që bie në dy muaj, por pa shkaktuar viktima, veçse dëme të konsiderueshme materiale.
Ekspertët thonë se niveli i reshjeve është në të gjitha rastet shumë herë më i lartë se normalja e periudhës dhe shkaktare, sipas tyre është ngrohja globale.
Ndërkohë probleme ka patur edhe në vendin tonë.
Reshjet e shiut që nisën sot rreth mesditës kanë mbuluar rrugët e Shëngjinit ndërsa pushuesit boshatisën plazhin.
Intensiteti i reshjeve dhe prurjet e shumta përmbytën rrugët ndërsa kanalizimet e ujërave të zeza që u bashkuan me ato të bardha dolën në sipërfaqe. Kjo krijoi një pamje jo të këndshme për zonën turistike të Shëngjinit dhe vështirësoi lëvizjen e qytetarëve dhe makinave.
Ashtu sikurse ishte parashikuar reshjet e dendura të shiut kanë përfshirë një pjesë të mirë të territorit të vendit ku në disa zona janë shfaqur edhe në formë shtrëngatash. Pak para mesditës, reshjet përfshinë edhe kryeqytetin duke i kapur të papërgatitur qytetarët, të cilët në mëngjes dolën më mëngë të shkurtra dhe pa çadra.
LEXO EDHE: AMF: Nevojitet skemë kombëtare për përballimin e katastrofave natyrore
