Një peshk gjigant, gati 3 metra i gjatë, një krijesë e rrallë dhe misterioze e thellësive të oqeanit, u zbulua më 6 nëntor në plazhin Grandview në Encinitas, Kaliforni, shkruan CNN.
Kjo ishte hera e tretë brenda tre muajve që kjo specie e pazakontë shfaqet në brigjet e shtetit amerikan.
Sipas Institutit të Oqeanografisë Scripps, ky peshk u gjet nga Alison Laferriere dhe u transportua nga NOAA në Qendrën e Shkencave të Peshkimit në jugperëndim për studime të mëtejshme. Mostrat u morën dhe peshku u ngri, për analiza të ardhshme.
Krijesa të tilla njihen për pamjen e tyre të gjatë dhe të sheshtë si “gjarpër deti” dhe jetojnë në zonën mezopelagjike deri në 900 metra thellësi.
Legjendat japoneze i lidhin shfaqjet e tyre pranë bregut me tërmete dhe cunami, por studimet e fundit nuk kanë gjetur lidhje shkencore midis këtyre fenomeneve.
Ekspertët besojnë se këto shfaqje mund të lidhen me ndryshime në kushtet oqeanike, prandaj shpresojnë të kuptojnë më shumë rreth biologjisë dhe evoluimit të kësaj specieje përmes analizave gjenetike.
Peshku “rremë”, ose Oarfish, mbetet një nga krijesat më enigmatike të oqeanit, duke ofruar një mundësi të rrallë për zbulime shkencore të reja.
