Për shkak të shfaqjes së infektimeve me sëmundjen e “Murtajës Afrikane” dhe Gripit të shpendëve në disa vende, Shqipëria ka ndalur importet e derrave dhe shpendëve nga Sllovakia, Italia, Hungaria, Letonia, Bosnje-Hercegovina, Kroacia, Danimarka, Holanda, Belgjika, Bullgaria, Gjermania, Lituania, Estonia, Moldavia, Polonia dhe Ukraina.
Vendimi është marrë nga Ministria e Bujqësisë dhe Zhvillimit Rural, për një afat të pacaktuar.
Murtaja afrikane e derrit është sëmundje ngjitëse virale, që shkakton ethe hemorragjike te derrat e butë dhe të egër. Sipas gjetjeve të deritashme shkencore, sëmundja nuk transmetohet te njerëzit e as te kafshët e tjera.
Për shkak të sëmundjes së influencës aviare, nga Italia, Bullgaria, Gjermania, Kroacia, Danimarka, Hollanda dhe Belgjika është vendosur edhe bllokimi i importeve të shpendëve të gjallë dhe mishit të tyre.
Në fletoren zyrtare shkruhet se “Është vendosur ndalimi i importit dhe tranzitimit për në territorin e Republikës së Shqipërisë, e të gjithë kafshëve të gjalla të llojit derra të butë dhe të egër, produkteve të tyre, materialit biologjik dhe embrioneve të kafshëve të gjalla të llojit derra, mishin e freskët dhe nënprodukteve të tyre të kafshëve të llojit derra”.
Gjithashtu, është vendosur ndalimi i importit dhe tranzitimit për në territorin e Republikës së Shqipërisë të:
a) shpendëve të gjallë shtëpiakë;
b) zogjve 24-orësh;
c) shpendëve dekorativë;
ç) materialit biologjik të shpendëve;
d) vezëve të shpendëve;
dh) mishit të shpendëve të patrajtuar termikisht;
e) nënprodukteve të shpendëve të patrajtuar termikisht.
