Rrugët e Shqipërisë janë përgjakur mëngjesin e kësaj të enjteje. Policia njoftoi fillimisht, se një aksident i rëndë ndodhi në aksin rrugor Milot-Mamurras. Në një taksi udhëtonin 5 persona, shoferi dhe 4 pasagjerë, mes të cilëve edhe 2 fëmijë.
Si pasojë e humbjes së kontrollit të mjetit, humbi jetën 56-vjeçarja Prena Gjetani.
Të plagosur mbetën shoferi 40-vjeçar, pasagjerja 30-vjeçare dhe 2 fëmijë. Të gjithë ata janë dërguar në spital dhe ndodhen nën kujdesin e mjekëve.
Më pas, do të njoftohej një tjetër aksident i rëndë. Një makinë tip “Benz” që drejtohej nga një 25-vjeçar doli nga rruga dhe ra në një greminë, rreth 100 metra poshtë rrugës. Për pasojë do të ndërronte jetë shoferi.
Ndërkohë, pasagjeri që udhëtonte me të, një 19-vjeçar, i plagosur rëndë, është dërguar në spitalin e Tiranës për ndihmë më të specializuar.
Aksidenti tragjik ndodhi në Rrugën e Kombit në afërsi të fshatit Kolsh.
Por aksidentet e përgjakshme nuk mbarojnë këtu.
Në fshatin Boçovë të Fierit, shtetasi Eduart Metushi, 43 vjeç, duke punuar me zetor në tokat e fshatit Boçovë, ka humbur kontrollin mbi drejtimin e tij dhe ka rënë në kanal duke e zënë zetori poshtë.
Për pasojë 43-vjeçari ka ndërruar jetë.
