Investitorët e një obligacioni katastrofash (cat bond) të lidhur me Xhamajkën po përgatiten për humbje të pjesshme, teksa Uragani Melisa, me forcën e një stuhie të kategorisë 5, po afrohet me ishullin.
Sipas ekspertëve të Icosa Investments AG, ekziston një “shans i lartë” që të aktivizohet pagesa nga cat bond-i prej 150 milionë dollarësh, i krijuar nga Banka Botërore për të mbuluar dëmet nga fatkeqësitë më ekstreme.
Tregjet e sigurimeve parashikojnë se vlera e obligacionit mund të bjerë me mbi 30%, ndërsa humbjet totale nga uragani mund të arrijnë nga 5 deri në 16 miliardë dollarë. Edhe pse ndikimi në tregun global të cat bond-eve, me vlerë mbi 55 miliardë dollarë, pritet të jetë i kufizuar, kjo ngjarje pritet të testojë sistemin e mbrojtjes së Xhamajkës, një prej vendeve më të ekspozuara në botë ndaj fatkeqësive natyrore.
