Primet e sigurimit për rrezik lufte për ngarkesat që dërgohen në Izrael janë rritur deri në trefish krahasuar me një javë më parë, ndërsa lufta mes Izraelit dhe Iranit ka hyrë në ditën e pestë.
Kostoja për një udhëtim shtatëditor drejt porteve izraelite është kuotuar tashmë nga 0.7% deri në 1.0% të vlerës së anijes, nga rreth 0.2% që ishte një javë më parë.
Megjithatë, këto prime ende mbeten më të ulëta se kulmi prej mbi 2% i regjistruar në nëntor 2023, pas sulmit të Hamasit ndaj Izraelit, që vrau 1,200 persona dhe shkaktoi pushtimin izraelit të Gazës.
Çdo sigurues individual cakton çmime dhe norma të ndryshme, por kjo rritje i shton dhjetëra mijëra dollarë në kosto për çdo udhëtim.
“Anijet që ndalojnë posaçërisht në Izrael po trajtohen rast pas rasti, me tarifa që shkojnë deri në 1% për një ndalesë 7-ditore – në varësi të ngarkesës, pronësisë dhe portit,” tha për Reuters David Smith, drejtues i sektorit detar në ndërmjetësin e sigurimeve McGill and Partners.
Izraeli varet shumë nga rrugët detare për importet e tij, të cilat vijnë përmes porteve në Mesdhe, si Ashdodi (afër Gazës në jug), Haifa (në veri), si dhe përmes portit të Eilat në Detin e Kuq.
Më 16 qershor, kompania Bazan Group mbylli rafinerinë e saj të naftës në Haifa – më e madhja në vend – pasi një sulm iranian dëmtoi termocentralin që e furnizonte me energji.
Të martën, sipas të dhënave të MarineTraffic, rreth 30 anije, shumica transportues të mallrave të përgjithshme, qëndronin të ankoruara në gjirin e Haifës.
Megjithatë, të gjitha terminalet portuale në Haifa po funksionojnë normalisht, tha një burim izraelit i përfshirë në industrinë portuale lokale.
Ndërkohë, shumë kompani detare janë gjithnjë e më të kujdesshme për të lundruar drejt Izraelit për shkak të rrezikut të lartë.
Rebelët Houthi të mbështetur nga Irani në Jemen kanë deklaruar se do të sulmojnë çdo anije me lidhje izraelite, pavarësisht marrëveshjes për armëpushim që kanë me anijet e lidhura me SHBA-në dhe Britaninë në Detin e Kuq.
Në mars, milicia shpalli një “bllokadë detare” ndaj portit të Haifës, si reagim ndaj vazhdimit të konfliktit të Izraelit në Gaza.
