Autoritetet spanjolle dhe portugeze janë përgatitur sot, të mërkurën, për ndikimin e Stuhisë Leo, duke pezulluar mësimin në disa zona dhe duke paralajmëruar për udhëtimet, vetëm një javë pasi Stuhia vdekjeprurëse Kristin shkaktoi shkatërrim në të gjithë Gadishullin Iberik.
Agjencia shtetërore meteorologjike e Spanjës, AEMET, parashikon që disa pjesë të jugut të Sierra Grazalema mund të regjistrojnë reshje që përkojnë me një vit të tërë të shiut nga kjo stuhi. Autoritetet janë të shqetësuara për rrezikun e lartë të përmbytjeve, pasi toka mbetet e njomur nga stuhia paraprake dhe reshjet e dendura të muajit të kaluar.
Spanja regjistroi 119.3 mm reshje në janar, 85% mbi mesataren e viteve 1992–2020, duke e bërë janarin e dytë më të lagësht të shekullit 21, tha Ministria e Mjedisit. Qeveria rajonale në rajonin jugor të Andaluzisë kërkoi nga banorët të shmangin udhëtimet jo-thelbësore, duke paralajmëruar se sinjalet për sigurinë publike mund të rriten shpejt deri në nivelin më të lartë të alarmit të kuq ndërsa stuhi zhvillohet, tha lideri rajonal Juanma Moreno.
Mësimi në shkolla u pezullua në të gjithë rajonin, përveç provincës Almeria, ndërsa Njësia Ushtarake Emergjente e Spanjës ishte në gatishmëri për të ofruar një përgjigje të shpejtë, duke përfshirë shpëtimin nga përmbytjet, stabilizimin e zonave me rrezik rrëshqitjeje dhe monitorimin e digave të mbetjeve të minierave që rrezikojnë të përmbyten. Qendrat ditore për të moshuarit dhe personat me aftësi të kufizuara janë mbyllur, dhe qeveritë lokale në zonat e prekura u këshilluan të anulojnë aktivitetet sportive në natyrë, ndërsa rreth 3,000 persona janë evakuuar nga zonat më të rrezikuara nga përmbytjet.
Rajonet me rrezik të lartë përfshijnë Grazalema, Campo de Gibraltar, Ronda dhe disa pjesë të Jaen, ku banorët morën paralajmërime përmes telefonave celularë për mundësinë e reshjeve të dendura. Personeli i emergjencës, së bashku me dy aeroplanë dhe dy helikopterë, janë vendosur për të monitoruar zonat e rrezikuara nga përmbytjet dhe për të dhënë informacion në kohë reale, tha Moreno.
Në Portugali, Shërbimi Kombëtar i Mbrojtjes Civile ngriti nivelin e gatishmërisë në maksimum, ndërsa komandanti i tij paralajmëroi për një situatë meteorologjike “shumë komplekse“.
Forcat e armatosura portugeze vendosën deri në 3,000 persona dhe 42 varka të fryra me ekipe detare përgjatë segmenteve të lumenjve kryesorë të vendit, që janë të prirur për përmbytje, pasi parashikimet e motit pritet të përkeqësohen gjatë javës.
