Sigurimi i produkteve bujqësore është një mbrojtje e rëndësishme për fermerët përballë rreziqeve natyrore dhe dëmeve të papritura.
Megjithatë, si çdo kontratë sigurimi, edhe këto polica kanë përjashtime të qarta, të cilat çdo fermer duhet t’i njohë për të shmangur keqkuptimet dhe për të përfituar sa më drejt nga mbulimi.
Ndër rastet kur kompania e sigurimeve nuk mban përgjegjësi janë:
kur dëmet shkaktohen nga pakujdesia e rëndë apo faji i vetë të siguruarit ose familjarëve të tij;
kur nuk janë zbatuar masat agroteknike të përshkruara në marrëveshje;
ose kur dëmet vijnë nga luftë, trazira, greva apo urdhra të autoriteteve shtetërore.
Po ashtu, përjashtohen edhe dëmet e shkaktuara nga rrezatimi bërthamor, kafshët, shpendët, apo ndërhyrje të palëve të treta në tokën e kultivuar.
Për shembull, nëse një fermer nuk kryen pastrimin e duhur të tokës dhe mbjell pa ndjekur masat bazë agroteknike, dhe më pas kultura dëmtohet nga insektet apo sëmundjet, ky dëm nuk mbulohet nga sigurimi.
Gjithashtu, nëse dëmtimi vjen si pasojë e kalimit të bagëtive të një pale të tretë në arën e mbjellë, edhe ky rast përjashtohet nga mbulimi.
Prandaj, për të qenë të mbrojtur realisht, fermerët duhet të zbatojnë me përpikmëri kushtet e kontratës dhe masat teknike të përcaktuara.
