Marrëdhëniet seksuale të pambrojtura, me shumë partnerë apo sjelljet e tjera te rrezikshme po shtojnë infeksionet seksualisht të transmetueshme.
Alarmi ngrihet nga mjekët e shërbimit infektiv në QSUT të cilët po konstatojnë rritje të rasteve me Sifiliz, me Hiv apo të dyja infeksionet së bashku.
Mjeku Arjan Harxhi tregon për A2 CNN se, vitin e fundit numri i të prekurve me sifiliz po arrin shifrat e sëmundshmërisë të shënuara në 10 vjet.
Mirëpo ajo që e bën edhe më alarmante situatën është fakti se sifilizi dhe infeksionet e tjera seksualisht të transmetueshme po konstatohen edhe tek të rinjtë e adoleshentët.
Mjekët rekomandojnë politika të veçanta për kontrolle, si dhe edukimin e të rinjve për rrezikun ndaj tyre.
Thuajse të gjithë pacientët e prekur nga sifilizi apo infeksionet e tjera seksualisht të transmetueshme, shkojnë në stade të avancuara të sëmundjes, duke rrezikuar shëndetin riprodhues deri në sterilitet. Ndërsa infeksioni nga HIV-AIDS merr jetën.
