Mediat online po gëlojnë nga lajmet se Kina është duke u përballur me një tjetër epidemi, me pamjet në rrjet që tregojnë spitalet atje të mbushura plot me njerëz.
Pesë vjet nga shpërthimi i Covid 19-tës që gjunjëzoi botën, e fillesat i pati pikërisht në këtë vend, shqetësime të mëdha po ngrihen pas një numri të madh infektimesh me HMPV, apo metapneumovirusi njerëzor.
Postime të ndryshme në rrjetet sociale tregojnë se shumë prej pacientëve që kanë vërshuar në spitalet kineze, janë duke përjetuar simptoma të ngjashme me koronavirusin.
I zbuluar në 2001-shin në Holandë, HMPV është një virus sezonal që zakonisht shkakton infeksione të mushkërive. Por shpërthimi i tij i tanishëm në Kinë duket se është mjaft më serioz.
Sipas gazetës shtetërore China Daily, përhapja e shpejtë e HMPV në Kinë është pohuar tashmë nga Qendra Kineze për Kontrollin dhe Parandalimin e Sëmundjeve. Megjithatë, ndryshe nga sa raportohet në internet, një përfaqësues i kësaj agjencie, Kan Biao, tentoi ta minimizonte ashpërsinë e shpërthimit të raportuar,epidemic e deklaroi se në fakt, se një rritje e infeksioneve të HMPV, gripit apo pneumonisë, është e pritshme gjatë dimrit.
Autoritetet vendase pohuan gjithashtu se përhapja e norovirusit, një infeksion i stomakut që shkakton të vjella dhe diarre, do të mbetet në nivele të larta përgjatë dy muajve të ardhshëm.
Shoqata Amerikane e Mushkërive thotë se HMPV është një shkaktar kryesor i infeksionit akut respirator dhe, ashtu si gripi përhapet nga kontakti i ngushtë me një individ të infektuar, ndërsa ka shenja që ngjasojnë me atë të ftohjes së zakonshme e zakonisht zgjasin dy deri në pesë ditë.
