Fillimi i sezonit të verës dhe shtimi i trafikut në rrugë është shoqëruar dhe me më shumë përplasje të automjeteve dhe të dëmtuarve prej tyre.
Muaji qershor ka shënuar një rritje të ndjeshme të numrit të aksidenteve në vend, sipas të dhënave të INSTAT.
Nga 101 aksidente në qershor 2023, në të njëjtin muaj të këtij viti u shënuan 141 të tilla, ose rreth 40% më shumë.
Në rritje të ndjeshme ishte dhe numri i të aksidentuarve.
Sipas INSTAT, ka patur gjithsej 195 të dëmtuar në qershor (të vrarë dhe të plagosur), nga 132 në të njëjtën periudhë të një viti më parë, me rritje prej 48%.
Për 6 muajt e parë të vitit, në Shqipëri kanë ndodhur 767 aksidente, me një rritje prej 46.3% në krahasim me janar-qershor të një viti më parë.
Në të njëjtën linjë janë rritur dhe të dëmtuarit teksa janë mbi 1 mijë persona që kanë pësuar një dëmtim ose rreth 45% më shumë në krahasim me të njëjtën periudhë të një viti më parë.
Aksidentet rrugore, në 92,9 % të rasteve, kanë ndodhur si pasojë e sjelljes së drejtuesit të mjetit.
Numri më i lartë i aksidenteve, në këtë periudhë, është kryer nga grup-mosha 0-24 vjeç dhe 60+ vjeç, duke zënë secila nga 21,3 % të numrit të aksidenteve gjithsej.
Në muajin Qershor 2024, numri më i lartë i aksidenteve rrugore ka ndodhur përgjatë ditës së Premte me 17,7 %, ndërsa numri më i ulët i aksidenteve ka ndodhur përgjatë ditës së Mërkurë, me 9,2 %.
Numri më i lartë i aksidenteve rrugore ka ndodhur përgjatë harkut kohor 08:00-12:00, duke zënë 18,4 % të numrit të aksidenteve rrugore gjithsej, raporton INSTAT.
LEXO EDHE: Kujdes me shpejtësinë! Shtohen urgjencat nga traumat, 18 aksidente çdo ditë
